Nos mester ta orguyoso di nos idioma materno
ORANJESTAD – Minister di Finansa, Asuntonan Economico y Cultura Sra. Xiomara Ruiz-Maduro tabata hunto cu collega Minister Rudy Lampe presente den Parlamento pa trata e Ley di Ortografia di Papiamento. E ley aki ta pa oficialisa e forma corecto di skirbi nos idioma materno Papiamento. E mandatario a cuminsa su disertacion gradiciendo tur hende cu a haci esfuerso grandi pa awe Papiamento por ta idioma oficial banda di Hulandes y cu awe e forma corecto di skirbi Papiamento tambe ta keda oficialisa. Papiamento ta un idioma completo cu a desaroya mas di 350 aña pasa. E ta un tesoro y un di e idiomanan crioyo mas desaroya na mundo. Nos por ta orguyoso di nos Papiamento, e ta fundeshi di nos comunidad. Pesey nos mester cuid’e y tene na bida cu nos diciplina y esfuerso pa papi’e y skirbi’e corectamente.
Minister Ruiz-Maduro tabata tin palabra di gradicimento pa, entro otro, sra Joyce Pereira, sr. Ramon Todd Dandere, sr Etley Lasten, sr Pedro Velasquez, sra Evelyn Ruiz Croes, sra Mientje Croes y tur otro experto cu tabata presente den tribuna na Parlamento of cu por a scucha e disertacion, pa e trabao y esfuerso grandi haci pa Papiamento por ta awe riba e tarima principal di nos Pais. Danki pa tur boso esfuerso, danki pa mustra nos e balor cu Papiamento tin, danki pa brinda nos e oportunidad di biba nos cultura por medio di nos idioma Papiamento.
Na final Minister Ruiz-Maduro a haci un apelacion fuerte pa Parlamento, Gobierno, Prensa, Enseñansa, sector priva pa nos haci un esfuerso pa skirbi Papiamento corectamente. Papiamento como parti di nos cultura, nos mester papi’e, cuid’e y bib’e.
