ORANJESTAD – Minister di Deporte Sr. Dangui Oduber ta anuncia cu te ainda no tin fecha pa yegada di Xander Bogaerts. Gobierno di Aruba a instala un comision cu ta organisando algo sumamente grandi pa Aruba su orguyo segun e mandatario. E comision aki ta den contacto cu e famia y tambe e fundacion Dare to Dream pa asina coordina na e mihor manera y tambe cumpli cu deseonan di Xander.
CELEBRACION NACIONAL
E lo bira un celebracion nacional pa asina hunto por uni e pais aki y celebra en conhunto un logro asina grandi y historico. “E logro di Xander pa su mes y pa su pais Aruba ta hopi grandi y nos mester dune e reconocemento cu e merece. Di parti oficina di turismo tambe nos ta bezig cu diferente campañanan den media na Boston awe” e Minister a sigui bisa.
EMBAHADOR
E mandatario a bisa cu Xander sigur ta wordo considera un embahador pa nos pais y e promocion cu e la haci y ta haciendo ta algo impagabel. “Nos como gobierno lo informa comunidad ki dia e celebracion grandi aki lo tuma lugar” e Minister a finalisa bisando.
SERIE MUNDIAL
Diadomingo ultimo, Boston Red Sox a titular campeon mundial di Serie Mundial cu Xander Bogaerts como parti di e ekipo. Cu esaki, Xander ta logra su di dos renchi, cu ta e artefacto mas codicia den mundo di baseball professional, esta e renchi di serie mundial. Awe mainta Xander a participa den e parada di Victoria na Boston.