Crisis migratorio na Venezuela tin un impacto hopi grandi na Aruba. Esaki ta algo hopi preocupante pa Gabinete Wever-Croes. E sucecido di algun dia pasa unda cu dos persona a perde nan bida ora nan a purba cruza lama pa drenta nos isla, a laga un tristesa y preocupacion grandi atras pa Gobierno di Aruba. Durante fin di siman, Gobierno Venezolano a busca e curpanan pa asina nan famia dera nan.
E problematica di e crisis migratorio di Venezuela tin atencion completo di Gobierno di Aruba. Siman pasa Gobierno y Prome Minister a trata e tema di Venezuela riba diferente nivel.
Prome Minister, na e cumbre trilateral na Sint Maarten a trata e tema di migracion cu Prome Ministernan di Sint Maarten y Corsou. Aki a yega na un convenio pa traha hunto riba e situacion di migracion di Venezuela. E prome paso den esaki ta pa haci peticion na Social Economische Raad (SER) di Aruba, Corsou y Sint Maarten pa haci investigacion cu lo pone tur pais riba e mesun linea riba e tema aki.
Prome Minister a trata e tema aki tambe siman pasa cu State Department mericano pa asina yega na conclusionnan con Aruba por haya yudansa di nan pa cu e situacion aki.
Tambe den e reunion cu ehecutivonan di Union Europeo, Prome Minister a toca e tema aki. Prome cu esaki, Presidente di Parlamento, señor Ady Thijsen, durante e reunion di EuroLat a indica na nan cu Aruba tin mester di fondo pa atende cu e crisis migratorio Venezolano. Union Europeo na prome instante no tawata mucho di acuerdo cu esaki pero a bira den e transcurso di e reunion mas receptivo. Y na Sint Maarten Prome Minister a splica mas detayadamente na unda Aruba ta para den e situacion aki y e situacion te rekeri di yudansa di Parti di Union Europeo. Y di parti di Union Europeo, inmediatamente a nota cu nan a cuminsa move pa duna Aruba e yudansa.
Tur tres reunion cu esnan concerni a termina bon unda cu convenio y acuerdonan a wordo haci pa asina Aruba ricibi e yudansa necesario cu tin mester pa trece alivio den e situacion di e crisis migratorio di Venezuala. Gobierno di Aruba ta den espera di e proximo conbersacionnan riba e tema aki pa asina concretisa na unda y con lo ricibi ayudo di tanto Departamento di Estado Mericano y of di Union Europeo.
Prome Minister Evelyn Wever-Croes ta haci un apelacion na comunidad di Aruba y e comunidad Venezolano cu ta biba na Aruba cu ta pensa pa nan trece nan famia di e forma aki, pa considera esaki ya cu e biahe aki no ta uno facil sino uno basta peligroso.
“Na momento cu un familiar of amigo ta manda placa pa trece nan hendenan for di Venezuela keriendo cu e biahenan den e balseronan of botonan aki ta sigur, esaki no ta e caso. E biahenan aki ta keda peligroso. Mi ta haci un apelacion pa pensa bon prome cu pone bida di un ser keri na peliger”, Prome Minister Evelyn Wever-Croes a expresa.