Ora cu nos tin respet pa e decision, e tereno, e profesionalismo di cada un, nos ta bay dilanti.
ORANJESTAD – Siman pasa gobierno di Aruba a marca historia y a organisa e promer “Conferencia Liderazgo y Integridad” cu participacion di tur hefenan di departamentonan gubernamental. Minister di Finansa, Asuntonan Economico y Cultura Sra. mr. Xiomara Ruiz-Maduro a participa y durante e discusionnan a haci uso di e oportunidad y a haci un intervencion treciendo su mensahe dilanti pa asina duna un contribucion tambe na e discusion.
E mandatario a trece dilanti cu hopi bez un persona ta haci algo y ora cu atende, bo ta tende di e discusion: “Mi a sconde tras di lomba di minister, anto e minister ta bisa si pero e no a bisami nada, kiermen ta e hoofd van dienst a dicidi otro, e ta bira un wega ta ken ta sconde tras di lomba di ken, anto eynan ta unda nos mester para straight den nos sapato. E hoofd van dienst tin su responsabilidad, kizas bo no ta gusta loke minister a dunabo como opdracht, pero bo ta pone preto riba blanco si, cu bo no tabata eens cu e opdracht. Segun Minister Ruiz-Maduro, e bestuurder tambe e ora tin su responsabilidad y como politico mi ta bisa semper: “Corda bon como bestuurder bon tin cu cu respeta e profesionalismo di esun cu ta guia e departamento, den e caso aki e hoofd van dienst, cu tin su propio responsabilidad, como politico bo ta haci e parti di bestuurder, manera e dicho ‘El Politico aqui soy yo.’ Kiermen ora bo ta bay riba tereno politico, bo por spera cu ta bin un contesta politico, ora bo ta keda profesional, e bestuurder tambe mester atende profesional.
Minister Xiomara Ruiz-Maduro cu esaki ta trece dilanti cu cada uno di nos den gobierno tin su responsabilidad, ta pesey nos tin hoofden van diensten, ta pesey tin ministernan y cada uno tin su teritorio pa tuma decision y nos mester respeta esey. Ora cu nos tin respet pa e decision, e tereno, e profesionalismo di cada un, nos ta bay dilanti. Mester corda semper nos mester keda para straight den nos sapato pa nos mes y pa nos pais. Cu e mensahe aki Minister Xiomara Ruiz-Maduro kier a duna su aporte na e discusion durante e Conferencia Liderazgo y Integridad, cu ta asina importante pasobra integridad ta bo cara, cara di bo gobierno y cara di bo pais.