ORANJESTAD – Facilita e caminda pa hobennan den bijstand por medio di guia y training pa asina nan logra haya un trabou satisfactorio of pa termina nan estudio y sali for di e situacion di bijstand. Esaki ta meta di e proyecto ‘riba caminda pa trabou’ cu Departamento di Asunto Social a cuminsa cu ne na december di aña 2017. Recientemente a cuminsa cu e di dos grupo consistiendo di mamanan soltera. E grupo aki ta consisti di 30 mama soltera.
WOW Aruba
Den luna di october WOW Aruba a organisa un seminario completamente gratis titula ‘avansa bo carera’ pa e mamanan soltera cu ta forma parti di e proyecto ‘riba caminda pa trabou’. WOW Aruba su meta ta, pa reuni hende muhenan pa asina establece contactonan, siña y apoya mutuamente. E idea ta pa brinda na e miembronan e oportunidad pa desaroya y mehora nan habilidadnan personal, social y profesional. WOW Aruba su mision ta pa alcansa su metanan pa medio di programanan educativo, oradornan profesional y diferente actividadnan. Tambe nan ta conta cu donacionnan pa asina recauda e fondonan necesario pa yuda hende muhenan den necesidad.
Seminario ‘avansa bo carera!’
E seminario ‘avansa bo carera’ a consisti di entre otro tipnan con pa traha un CV, con pa prepara bo mes pa un entrevista pa trabou y diferente tipnan practico.
Laura Peñate durante introduccion a splica ken ta WOW Aruba y tambe kico ta WOW Aruba su meta. Despues Shannon Henriquez a duna e mamanan tipnan di vestuario na momento di bay un entrevista pa trabou, tambe Shannon Henriquez a duna tipnan valioso riba cuido personal na momento di un entrevista.
Siguientemente cada participante a haya e oportunidad di saca un potret y despues a haya un formulario pa yena. Esaki pa haci e proceso na momento di siña con pa traha un CV, mas facil y lihe. Despues di a saca potret y yena e formulario, cada participante a sinta individual cu un persona di WOW Aruba y a haci un ‘rollenspel’ di con un entrevista pa trabou mester tuma luga. Tur participante a haya un lista di pregunta cu durante un entrevista pa trabou ta wordo haci, asina aki e participantenan por practica prome cu un entrevista pa trabou tuma luga y bay bon prepara.
Despues e participantenan a wordo parti den dos grupo, e prome grupo a sigui cu entrevista pa trabou y e otro grupo, con pa traha un CV. Esunnan cu a bay siña con pa traha un CV a sinta individual cu un persona di WOW Aruba tras di un laptop y di e manera aki cada uno a traha nan CV. E potret cu nan a saca anterior a wordo poni riba nan CV y tur e CV nan a wordo geprint y tambe a wordo manda via e-mail pa tur participante, pa asina tur participante por tin un CV pa uza den futuro.
Den e forma aki WOW Aruba, por medio di e seminario ‘avansa bo carera’ a sa di ekipa e mamanan soltera cu ta forma parti di e proyecto ‘riba caminda pa trabou’, cu tur informacion y conocemento necesario na momento di aplica y haci un entrevista pa un trabou.
Departamento di Asunto Social kier gradici WOW Aruba pa e tremendo seminario ‘avansa bo carera’ brinda na e grupo di mamanan soltera cu ta forma parti di e proyecto ‘na caminda pa trabou’ y kier motiva tur mama cu a participa, pa aplica tur locual cu nan a siña durante e seminario aki na momento cu un oportunidadnan presenta caminda mester aplica y haci un entrevista pa trabou.
Pa mas informacion tocante e proyecto ‘riba caminda pa trabou’ por tuma contacto cu Departamento di Asunto Social su seccion ‘Oficina Pa Hobennan’ sea cu ‘projectleider’ sra. drs. Marisol Krosendijk of cu ‘project administratieve medewerkster’ sra. Sheilah Odor, na telefon gratis 528-1100.