Home Entertainment FIEBRE DI ‘ISLAND TAKEOVER FESTIVAL’ TA TUR CAMINDA

FIEBRE DI ‘ISLAND TAKEOVER FESTIVAL’ TA TUR CAMINDA

ORANJESTAD:  Tanto na Aruba como den exterior e fiebre di e ‘Island TakeOver Festival’ cu ta tuma lugar e fin di siman aki ta grandi. Diferente caminda rond di nos isla por a mira un Dinosauro (Dino) ta move rond hunto cu un promo team di Island TakeOver. Ta trata aki di un di e mascotanan cu ta forma parti di e show internacional di J Balvin ( Vibras Tour ). Den su show na merca por mira diferente di e dinosauronan y t-rex cu ta parti di e show. Un di nan a logra bin Aruba pa lanta e fiebre di e evento. Tambe internacionalmente entre e artistanan den e genero urbano y electronico tin hopi combersacionan andando pa posibel biahenan di placer pa tambe experencia e ‘Island TakeOver’ entre 1 pa 4 di November 2018.

DINO

Durante e tour di diferente lugarnan unda tanto localnan como turista ta frecuenta por a mira cu for di muchanan te adulto ta para pa por saca potret cu ‘Dino’. Hopi peticion tambe a drenta pa ‘Dino’ pasa bishita diferente scol y establicimento. Naturalmente e promo team tabata responsabel pa asina parti flyers di e evento pa tur hende por ta na altura di e presencia di J Balvin, Bad Bunny, Alex Sensation y Jeon e fin di siman aki riba nos isla.

JEON

Diadomingo ultimo Jeon tabata tin un presentacion internacional dilanti miles di persona na American Airlines Arena Miami. Esaki tabata pa clausura e Vibras Tour di J Balvin. Aki Jeon a logra topa cu e.o Bad Bunny kende a confirma cu e ta hopi entusiasma pa bishita Aruba e fin di siman aki. Jeon a presenta riba e scenario hunto cu J Balvin y Anitta. Jeon mes durante e festival na Aruba lo bay duna Aruba un show inolvidabel. Un team di productornan a traha simanan largo pa hinca un show den otro. Por confirma tambe cu durante e show di Jeon lo tin varios artistanan sorpresa cu lo subi e escenario cu ne.

Passes pa e festival ta na benta na Citgo Boulevard, Citgo Palm Beach, Citgo Essoville , Superfood y AITO Pop Up Store na Renaissance Marketplace cual lo ta bendiendo tokens pa e bar y cushinafor di diamars. Por escohe entre Seccion general (AITO General Pass,  VIP Standing (AITO VIP Pass) y mesa VIP. Pa tur informacion tocante mesa mester jama 569-6446. Esnan cu tin nan pass cumpra of e-pass, nan por cuminsa acudi  for di diaranson na e Pop Up Store of Na Renaissance Marina Hotel pa cambia esaki pa un banchi y cumpra tokens.

Aruba Island Takeover (AITO) ta presenta pa Aruba Tourism Authority (ATA), Cerbez Presidente, MOET, SETAR N.V., Elite Empire Entertainment, EF, Aruba Marriot Resort, Top Drive, Hilton Aruba Caribbean, Hyatt Regency Aruba Resort, Fun Miles, Renaissance Aruba Resort, Hertz. Holiday Inn Resort  y Super Car Rental. Pa mas informacion, line-up di artista, compra di passes y mas bishita www.islandtakeover.com of www.facebook.com/islandtakeover.