Ryson Paskel ta deteni, e buskeda di casi dos luna a caba!!
Santa Cruz: Dialuna atardi algo prome cu 6’or y mey, recherche di Noord ta bin topa cu e fugitivo di husticia, Ryson Paskel, na un cas na Santa Cruz, net panort di e oficina di polis di Rijbewijs.
Ryson mesora ta wordo transporta pa warda di polis.
Tambe un persona mas a keda deteni, probablemente como un persona cu lo a yuda e fugitivo of a stroba trabou di polis, e tambe a wordo transporta pa Warda di Polis.
Ryson Paskel ta e sospechoso principal di e caso di hinkamento fatal dia 2 di september den Hotzone na Palm Beach, den cual e hoben Camilo Sosa a wordo hinka y a perde su bida.
For di 2 di September Ryson tabata wordo busca pa husticia a pone varios poster rond buscando e fugitivo aki, siman pasa a pone te hasta un billboard di su cara cu e ta wordo busca pa husticia.
Recherchenan di Noord a traha incansabelmente pa logra gara e fugitivo aki, pero dialuna atardi si nan a logra pone man riba e persona cu mas tabata wordo busca pa husticia.
Potret di detencion di Ryson Paskel ta Cortesia di 24ora.com.
Awo lo cuminsa e tramitenan y investigacionnan, pa asina Ryson haya e sentencia cu e merece, di a kita bida di un otro hoben cu tabata tin un bida yen soño, yen plannan su dilanti, cu nunca lo por realisa. Un hoben cu a bay laga su famia y amigonan cu un dolor profundo.
Awo e famianan di ambos hoben lo por sigui dilanti, famia di Camilo por sigui cu e segundo etapa cu ta mira husticia pa cu e morto di nan yiu, nieto, ruman, sobrino etc. y asina por sigui cu nan proceso di rouw.
Tambe famia di Ryson por ta trankil cu nan yiu, ruman, sobrino, nieto etc. ta den man di Husticia y no un fugitivo, nan tambe lo mester cuminsa biba e segundo etapa cu ta spera, cual ta e sentencia y e castigo pisa cu Ryson lo haya y cu e lo mester enfrenta na un edad hopi jong, un mucha cu su mama a muri bay lague na un edad hoben, na momento cu mas e tabata tin mester di dje.
Arubanative.com ta desea e famianan hopi forsa y tambe lo keda pendiente di e caso y tambe di e sentencia cu Ryson lo ricibi.