Home Lifestyle Hopi a cana pa sostene Mary Joan Foundation Pink Walk 2018

Hopi a cana pa sostene Mary Joan Foundation Pink Walk 2018

 

 

ORANJESTAD, Aruba – 28 di October 2018: Den fin di siman a tuma luga e “Pink Walk 2018” organisa dor di Mary Joan Foundation. Hopi persona a sostene e fundacion cu nan meta. Aruba Bank un biaha mas ta orguyoso di por a patrocina Mary Joan Foundation cu su “Pink Walk” cu ta tuma luga tur aña den luna di October.

 

E idea di Mary Joan Foundation pa tene un Pink Walk ta pa promove un manera di biba cu ta sano y saludabel. Tambe esaki tabata pa conscientisa tocante cancer di pecho, cual ta uno di e cancernan mas comun den hende muhe y tambe por pasa cu hende homber.

 

E ruta tabata di 5km y esaki a cuminsa for di Plaza Betico Croes pa 5:30 di atardi. Participantenan a yega trempan Plaza Betico Croes en espera di e caminata. Tur presente tabata cla pa sostene Mary Joan Foundation cu nan meta di yuda esunnan cu ta sufri di cancer.

 

Cada participante tabatin e oportunidad pa diseña nan mesun T-shirt y cu nan mensahe ariba dje. E participacion un biaha mas tabata grandi, unda cu por a mira sonrisa riba e cara di participantenan. Aruba Bank ta gradici cada participante cu a yuda na e meta di Mary Joan Foundation pa sigui traha na conscientisa riba cancer di pecho.