The Bottom – Durante su bishita dia 23 di october u.p. Cft a felicita Saba cu entrega na tempo di e documentonan presupuestario y cu continuacion di e bon maneho financiero. A papia cu Colegio Ehecutivo y cu Conseho Insular tocante e proyectonan di reconstruccion, e cuenta anual di 2017, e proyecto di presupuesto di 2019 y e maneho financiero.
Colegio di Supervision Financiero di Boneiro, Sint Eustatius y Saba (Cft) recientemente a emiti su conseho tocante e proyecto di presupuesto di 2019. Aunke esaki ta cumpli cu e rekisitonan legal, Saba no por reserva fondo pa e amortisacion obligatorio di e prestamonan financiero. Lo efectua e amortisacion cu e medionan di likides disponibel, cualnan ta ofrece suficiente espacio pa hacie.
Saba a entrega e cuenta anual di 2017 na tempo. E cuenta anual ta mustra un resultado positivo di aproximadamente USD 1,2 miyon y, pa e di cuater aña consecutivo, ta bay compaña pa un declaracion aprobatorio di accountant. Presidente di Cft Raymond Gradus: “Saba sa con pa mantene e maneho financiero na un bon nivel.” Ehecucion di e presupuesto di 2018 no ta mustra niun particularidad na e momentonan aki.
Durante e bishita di Cft na Saba a revisa renobacion di e aeropuerto y a discuti e plannan pa reconstruccion y ampliacion di e haf maritimo. Pa e proyectonan aki y pa otro proyecto Gobierno Hulandes a pone cantidad grandi di placa disponibel.
E bishita aki tabata tambe e prome bishita di Señor H.G.J. (Henk) Kamp. Señor Kamp a sucede Señora S.M. (Sybilla) Dekker entrante dia 1e. di juli. For di dia 1e. di juli 2018 Cft BES ta consisti di Presidente Raymond Gradus, miembro postula pa BES Herbert Domacassé y miembro postula pa Hulanda Henk Kamp.