Home International Tiroteo na un synagoge na Pittsburgh ta costa bida di 11 persona...

Tiroteo na un synagoge na Pittsburgh ta costa bida di 11 persona y varios otro a keda herida

Pittsburgh, Estados Unidos: Diasabra den oranan di mainta un homber a los varios tiro den un Synagoge den e cuidad di Pittsburgh na Estados Unidos. Den e tiroteo aki 11 persona a perde nan bida y varios otro a keda herida. Diasabra ta e dia cu e hudieunan ta bishita nan synagoge pa Sabbat y pa e motibo aki tabata hopi druk den e synagoge.

Segun autoridad mericano entre victimanan no tabata tin mucha. E persona cu a los e tironan fatal a wordo identifica como Robert Bowers , aparentemente elo tabata grita cu “tur Hudieu lo mester muri”.

Robert Bowers lo a drenta e Synagoge ta tira. Mesora varios unidad di polis a bay direccion di e synagoge, pero asina mes como 4 agente policial a keda herida den e tiroteo aki.  E agressor tambe a keda herida pero na final a entrega su mes na autoridad. Ela wordo transporta pa hospital y sigur lo ta sper’e un castigo di morto, mirando cu Husticia lo persigui’e pa diferente crimen cu ela cometi.

Robert Bowers ta un persona cu tin un historia largo di expressionnan antisemita riba medionan social, expresando hopi mahos contra Hudieunan, entre otro cu “Hudieunan ta yiu Satanas”.

E presidente mericano Donald Trump a yama e sucedido un “mass murder”. Ela sigui expresa su mes, bisando cu si e Synagoge tabata tin un Security Guard arma, e sucedido aki lo a caba diferente, cu e agressor no lo por a mata niun hende, pero mas sigur e mes lo a fayece.  Segun Trump esaki no tin mucho di haber cu e Ley di arma di candela y sigur no lo haci mucho pa cambia e ley di arma di candela, pero loke si Tromp kier haci ta, haci e ley of tur loke cu tin di haber cu castigo di morto, mas severo.

E  premier di Israel, Benjamin Netanyahu a reaciona bisando cu e ta den shock pa loke a pasa y ela manda un grabacion riba video papiando di e violencia antisemita, tambe ela expresa bisando cu henter Israel ta conviviendo cu famia di e fayecidonan.