Oranjestad: Diabierna den oranan di atardi por a mira ora nan tabata poniendo un poster di e hoben fugitivo di Husticia, Ryson Juleano Paskel di 19 aña. E billboard ta poni, un poco pariba di e rotonde Banco di Caribe, na cuminsamento di Caya Papa Juan Pablo (antes Rondweg).
Asina aki ta spera cu autoridad lo por haya e tips di oro of cu e hoben aki por recapacita y entrega su mes na autoridad y enfrenta su castigo. Tambe pa asina tin paz bek pa e famia di e victima, pa nan por sigui cu nan proceso di rouw y tambe pa famia di Ryson por sigui biba na paz, paso biba como fugitivo bo nunca sa con elo termina.
Ryson Paskel ta e sospechoso principal den e tristo caso di asesinato di Diadomingo marduga 2 di September den e area di Hotzone na Palm Beach, caminda e hoben Camilo Sosa a wordo hinka y a perde su bida.
Durante e mesun Diadomingo cu e asesinato a tuma lugar, den oranan di atardi polis a drenta un cas na Tanki Leendert caminda nan a topa cu e Pickup cu Ryson Paskel a usa pa bandona e sitio, despues cu ela hinka Camilo. Polis a confisca e auto pa mas investigacion, pero no a topa cu Ryson na e cas, e cas aki ta unda Ryson lo tabata biba.
Polis ta sigui busca, nan ta haya tips, pero te awe sin resultado, mientras famia di Camilo Sosa tin cu sigui biba cu e dolor, cu Camilo a wordo ranca cruelmente for nan y alabes tin cu biba cu ainda no tin Husticia pa Camilo su morto, paso e asesino ta un fugitivo di Husticia.
Famia di Camilo ta organizando un Caminata di Paz na memoria di Camilo. Famia ta invita henter Aruba pa participa na e caminata aki, cu lo tuma lugar Diadomingo dia 28 di Oktober pa 5’or di atardi, saliendo for di hotel Ritz Carlton/ Marriot Resort, e caminata lo pasa banda di Palm Beach Plaza, lo pasa den e area di High Rise y lo caba na altura di e edificio di Strandpolitie, ta pidi tur hende pa bin na blanco bisti y pa ta 4’or y 15 presente na Marriott/Ritz Carlton.
Famia y amigonan di Camilo Sosa ta conta cu e participacion di henter Aruba na e Walk of Peace aki, na memoria di Camilo.
