Recientemente, Fraccion di MEP a inicia un session di informacion pa contra aresta informacionnan eroneo y uzo fout di informacionnan cu ta tumando luga cu e unico intencion pa mal informa pueblo atrobe. Cu ‘FactCheck’, Fraccion di MEP ta expone e mal informacionnan aki y hunto cu n’e ta pone e berdad pa tur ciudadano di nos pais realisa y comprende cu oposicion no ta honesto ora di informa pueblo y alabes nos fraccion ta divulga e Fuente di informacion manera un website.
Parlamentario Setty Christiaans-Yarzagaray a constata cu atrobe ex Prome Minister M. Eman ta tribi di sali cu un rapport, e biaha aki cu rapport di CBS na unda e ex mandatario ta menciona inflacion dunando pueblo informacion robes di e motibo corecto y desaroyo di cierto cosnan na Aruba.
E Parlamentario ta considera cu como un politico cu a traha na CBS pa basta aña y sa exactamente con e cifranan cu e ex mandatario a menciona ta wordo calcula, e por ta e persona mas indica pa contra aresta tur loke señor Eman a papia. No solamente esaki, sino e Parlamentario ta bisa cu e sa bon tambe con y pakico e mes un señor Eman aki a uza cifranan durante 8 aña cu el a goberna nos pais.
Bayendo bek na rapportnan cu ta midi inflaccion cu ta sali di CBS, Parlamentario Christiaans-Yarzagaray a indica cu señor Eman a duna un imagen falso di e situacion real. E ex mandatario a bisa cu door cu Gobierno di Aruba a introduci e crisisheffing, awo e poder di compras ta bay atras, mientras cu Eman mes no a haci nada substancial pa mehora e poder di compras pero si ta pretende hopi di a haci algo.
E ex mandatario a indica cu e crisisheffing ta relata na crecemento di 10% cu segun Parlamentario Christiaans-Yarzagaray no ta berdad. Na Aruba tin dos metodo pa midi inflacion. End of Period Inflation cu ta basa riba 12 luna y Period Average Inflacion cu ta basa riba 24 luna. E inflacion basa riba 12 luna, juli 2017 pa juli 2018 a subi cu 5.1% mientras inflacion basa riba 24 luna, ta 1.8% (Table 2 y 4 di CBS).
E Parlamentario ta inidica cu e inflacion di juli 2017 te cu juli 2018 ta na 5.1% enberdad pero Eman no por pretende awo cu e inflacion a wordo causa door di e crisisheffing siendo cu riba pagina 3 di e rapport di CBS publica augustus ultimo (Table 5 di CBS), ta duna un splicacion cla cu ta pasobra prijsnan internacional di crudo cu na su turno ta relata na prijs di gasolin, a causa e cambio drastico den e prijs di inflacion. Pa e motibo aki, y no pa via di e crisisheffing, awe nos ta para na 5.1% di un inflacion di End of Period y na 1.8% pa e calculacion basa riba 24 luna, esta Period Average.
E Parlamento ta bisa cu ta di comprende cu esaki no ta un materia facil ni pa cu e ex Prome Minister por comprende facilmente. Por observa ora di bay bek na e prijs di crudo tempo cu e tawata goberna, por ripara cu na juli 2017, esaki tawata na US$ 46.30 pa bari. Na juli 2018, e prijs di crudo tawata na US$ 71.16 pa bari, cu ta casi US$ 25 mas cu e aña anterior. Mustrando alabes riba e mesun tabel (5), e Parlamentario ta bisa cu e prijs di awa y coriente di aña pasa y di e aña aki a keda mescos si! Cu esaki e Parlamentario ta indica cu eora e crecemento aki di $25 den un aña di tempo a causa e inflacion grandemente mientras cu tur hende sa cu prijs di gasolin ta determina door di prijs di crudo manera ta wordo indica den e rapport di CBS. Por lo tanto M. Eman por wel di stop di di manipula mente di e pueblo aki door di pretende cu e inflacion a wordo ocasiona door di e introduccion di e crisisheffing.
Den e mesun rapport di CBS, ta wordo papia di Core Inflation tambe. Esaki ta e cambio di prijs di inflacion excluyendo cierto product cu tin efecto di prijs volatil y pues ta exclui prijs di gasolin y productonan di cuminda cualnan ta mas volatil. Di e 5.1% cu inflacion ta, Core Inflation eora ta 1.4% di juli 2017 pa juli 2018. Por conclui pues cu casi 4% a wordo ocasiona door di e crecemento den prijs di crudo y prijs di gasoline grandemente y algun componente di cuminda (table 10 di CBS).
Parlamentario Christiaans-Yarzagaray ta duna di conoce cu e pruebanan aki cu el a trece dilanti, ta mustra claramente cu atrobe e ex prome Minister di Aruba, M. Eman, ta trece informacion eroneo dilanti purbando di gaña y manipula cu informacion pa purba cambia pensamento di hende. Loke Eman a trece dilanti NO ta causa di e introduccion di e crisisheffing manera e ta pretende sino cu esaki ta causa door di e prijs di crudo internacional y su efecto di prijs di gasolin cu ta wordo ahusta na Aruba primordialmente. For di e table di core inflacion por observa claramente cu prijs di gasolin y diesel a experencia un crecemento di 12.0% te cu juli di 2018
Parlamentario Setty Christiaans-Yarzagaray atrobe ta bisa na M. Eman pa corda cu den e tempo modern di awentempo cu informacion ta na alcanse di tur hende y pa stop di abusa di inteligencia di hende manera cos cu nos mes no por lesa y comprende con situacion real di Aruba ta. Miho e stop cu su uzo di cifranan eroneo y stop di manipula pueblo y cuminsa papia cu pueblo cu e berdad y informa e pueblo aki con realmente cosnan ta. Informando pueblo di situacion y cu datonan real, nos ta yuda educa pueblo y por debati riba nivel. Ademas cu gañamento y manipulacion ya ta politica biew, uzo eroneo y manipulacion cu informacion ta hustamente motibonan pakico awe Aruba su situacion financiero, economico y social ta manera e ta, danki na M. Eman.
E rappost di CBS por wordo haya na e website di CBS (www.cbs.aw) y ta disponibel pa tur hende.