Ariba dianan 26, 27 y 28 di october proximo scol di baile Simadanza lo presenta un show di su alumnonan den Cas di Cultura. E show ta titula ‘Un anochi colorido cu Simadanza’.
Presentando un topico pa medio di baile, Simadanza kier yuda e publico aprecia baile den diferente aspecto.
Ehempelnan cu a uza den pasado ta entre otro “Save the Earth”, “Mama na mi cuminda”, “Nos pret’i wowo”, “Fin di aña cu Simadanza” etc.
E show ‘Un anochi colorido cu Simadanza’ lo conta cu un variacion di diferente baile, coreografia y musica.
Lo tin baile di pre-ballet pa muchanan chikito, ballet clasico pa hobennan, streetdance, jazz y folklore contemporaneo. E edad di e alumnonan ta varia di 4 aña te cu adulto.
Scol di baile Simadanza a wordo funda na 1975 y durante e ultimo cuarenta y tres añanan un gran cantidad di hoben y adulto a disfruta di lesnan di baile bou guia di e fundadoranan di Simadanza esta Astrid Salazar y Ina Profet.
Muchanan cu a cuminsa na chikito na e scol di baile, ainda como adulto ta sigui lesnan di baile na Simadanza.
Docentenan di baile cu a prepara e show ta Kimberley Milan, Tracy Pietersz, Wilma Kuiperi-Jansen, Ina Profet y Astrid Salazar. Cada docente a percura pa yuda e alumnonan cu diferente tecnica di baile y a traha coreografianan hopi special pa e show ‘Un anochi colorido cu Simadanza’.
Realisacion di show ta posibel gracias na e cooperacion ricibi di e alumnonan y nan mayornan durante e ultimo lunanan. Simadanza ta gradici e mayornan y e alumnonan pa nan dedicacion p’asina e scol di baile por presenta un biaha mas un bunita show den Cas di Cultura.
Ariba dianan 26 y 27 di october e show ta cuminsa pa 7:30 di anochi y diadomingo 28 di october pa 4 or di atardi. Carchi di entrada ta obtenibel na Simadanza den Dakota Shopping Paradise durante oranan di oficina, esta di 2 or pa 6 or di atardi y na Cas di Cultura.
Tur amante di baile y publico en general ta keda invita pa bin presencia e show di baile di Simadanza den Cas di Cultura!