Un di e temanan cu Richard Arends, Parlamentario di fraccion di AVP, a trece dilanti den conferencia di prensa tabata relaciona cu e leynan cu Parlamento ta bay trata proximamente den reunionan publico. E siman cu ta bin Parlamento lo trata e.o. e ley cu ta stipula e reglanan ora sera contratonan pa proyectonan di Gobierno segun e tratado di Organisacion Mundial di Comercio (WTO); lo trata e ley cu ta regla e posicion di deurwaardernan; e ley cu ta formalisa ortografia di Papiamento; como tambe e ley cu ta regla introduccion di e asina yama “gaming tax”.
Durante e conferencia di prensa e la para keto riba e “gaming tax”cu por tin efectonan hopi grave pa industria turistico. Ta trata di un impuesto riba casinonan cu durante gobernacion di MEP a wordo entrega na Parlamento na aña 2007. E impuesto ta consisti di un cambio di e base riba cual e impuesto ta wordo calcula: lo cambia cobramento impuesto for di e montante bruto cu ta wordo hunga (drop) pa e netto cu ta wordo gana (win). Anteriormente e tarifa pa e casino-drop tax tabata 4% y intencion di Gobierno pa cobra un 14% riba e suma cu ta wordo gana door di e clientenan den e casino. Fraccion di AVP ta combersando cu stakeholdernan, enbusca di nan pensamento riba e forma con e ley aki lo bay funciona. “Ya caba a ricibi informacion di AHATA cu introduccion di e ley awendia manera tabata e intencion na aña 2007 lo causa un aumento di entre 30-40% riba nan gastonan pa e operadornan di casino. Esaki lo pone sobrevivencia di varios casino cu ta emplea mama y tatanan di famia na peliger”
Durante periodo di gobernacion bou signatura di AVP a bay di acuerdo pa cambia e base di e “gaming tax” di “drop” pa “net win”, bou condicion cu e resultado pa Gobierno mester tabata “budget neutral”. “A yega na palabracionan concreto durante Dialogo Social di 2012 unda sector laboral y comercial a participa extensivamente,” Parlamentario Arends ta splika. “Gobierno a compromete su mes di no genera mas entrada cu cambio di e base aki.” Door di pusha e ley aki Gobierno ta bay back na e intencion original di 2007, poniendo resultado di dialogo cu a ser hiba na 2012 un banda sin tene cuenta cu e situacion actual. “Gobierno no a hiba ningun dialogo, ni tampoco tin ningun analisis riba e porcentahe di 14% cu ta wordo menciona awo den e situacion actual”
Fraccion di AVP ta preocupa cu esaki lo afecta e mundo hotelero y sector turistico, cu ta un area cu a sa di mantene su mes apesar di tur e desafionan. Ja caba e sector aki lo bay enfrenta retonan grandi otro aña, mirando cu e ocupacion di inventario di camber di otro islanan lo ta disponibel atrobe y lo haci e competencia hopi mas fuerte pa Aruba. “Cambionan abrupto den nos sistema y tarifanan di belasting ta contribui na un incertidumbre inecesario cu ta sigui reina den e inversionistanan” P’esey tambe e Parlamentario a finalisa bisando cu confiansa den Aruba su economia ta masha importante. Mester mantene cuponan di trabow y percura cu empresanan tin e confiansa pa sigui draai. Esaki ta completamente ausente den maneho economico di gobierno actual.