Home Politics Booshi Wever: E MANEHO anti-ARUBIANO  Y  “COLONIALISMO MODERNO” LO TA E “HIGHWAY...

Booshi Wever: E MANEHO anti-ARUBIANO  Y  “COLONIALISMO MODERNO” LO TA E “HIGHWAY TO HEAVEN” PA E ARUBIANO!

SHARE

 

 

Historia ta siña nos cu antes paisnan manera Spaña, Hulanda, Portugal, Francia y Inglaterra a cruza lama of  frontera y a invadi y bringa paisnan bisiña of otro paisnan y conkistanan. Nan a tuma gobernacionnan over y a obliga pueblonan pa somete esakinan na nan estilo di cultura, idioma y bandera. Asina aki hopi rasa a wordo extermina y no a keda nada mas di nan cu no ta leyenda, paso delaster un cos cu e invasornan aki por a horta di e civilisacionnan aki, nan a horta. Esaki tabata e “Colonialismo” den antiguedad. 

 

Na Aruba tin un “Colonialismo Moderno” ta tumando lugar. Esaki ta sosode cu cada permiso cu ta wordo extende na un stranhero, kende na su turno NO kier adapta ni na nos cultura ni adopta nos idioma Papiamento como di nan. Nan ta pretende di mantene nan identidad y cultura, siendo di a bandona nan pais di origen pa bin establece nan mes aki pasobra na su pais e situacion ta malo y e ta bin busca un mihor porvenir. Y mientras cu e ARUBIANO ta exigi tiki di respet pa su cultura y su idioma, Arubianonan y otro localnan, ta acusa e ARUBIANO di ta descrimina. Den e ultimo simannan aki nos por mira esaki, particularmente riba medianan social, na unda cu ta purba na snoer boca di e ARUBIANO cu ta pidi atencion pa e problematica di admision aki na Aruba y otorgamento indiscrimina di permisonan.

Pues aki nos ta mira con e maneho di admision ta mas importante cu e maneho di integracion. E palabra integracion den e titulo di e minister di Husticia, ta keda chikito, ya cu nos por mira cu desde e gobierno anterior, e mesun maneho ta sigui, esta pa caba cu e ARUBIANO.

UPP no tin nada contra ningun stranhero, of miembronan di Reino, sea ta Latino, Chines, Portugues, Mericano, Hulandes, Caribense, Corsou, Boneiro, etc. Loke UPP ta contra ta cu e ARUBIANO dia pa dia ta perde tereno, pasobra nos gobiernonan kier hunga e bon samaritano. Tur hende sa bon bon, cu Aruba ta pasando den su peor momentonan, pero toch gobierno y minister di Husticia y di Labor, ta hibando un maneho liberal, di porta habri y duna permiso pa traha aki na Aruba.

Mientras ta bin cu un comision di capacidad di carga, pero pa hustifica cu por traha 4000 camber mas di hotel, Aruba su espacio no ta birando mas grandi. Ta e mesun 192 kilometro cuadra di tempo cu e prome Indjannan cu a bin Aruba nos tin ainda.

 

Tur esaki ta sosode pa colmo ayuda netamente door di e ministro- y/o gobiernonan cu no ta importa nan un bledo kico ta pasa cu su propio comunidad. Pa e ministro/gobierno no ta importante cu e “ARUBIANO” ta wordo perhudica. E “colonialismo moderno” aki ta manifesta su mes e.o. cu cada stranhero cu obtene un permiso, despues di 3 aña si e kier trece 1-4 familiar cun’e, e por hacie! Esey ta e maneho nobo! Cu esaki “nos” gobierno ta pone cu a lo largo nos ARUBIANONAN lo ta den un minoria y e stranheronan aki lo tin e mayoria. Y despues “nos” gobierno, lo ta “nan” gobierno. Nos idioma, nos cultura, nos identidad lo bai perdi y e ARUBIANO tambe lo pasa pa historia unda aki un paar di aña  lo anuncia cu e ultimo “ARUBIANO”  a fayece. E maneho anti-ARUBIANO aki lo ta e “Highway to Heaven” pa e ARUBIANO!! Nos lucha ta pa Aruba ta DI y PA e ARUBIANO atrobe. Ta pesey mester para e “Colonialismo” aki. “PARA AWOR !!!!”

 

Booshi Wever

Lider UPP

Brazil 163

Aruba, 24 oktober 2018