Den cuadro di introduccion di Parke Marino, Minister di Desaroyo Teritorial, Infrastructura y Medio Ambiente Otmar Oduber a bishita 7 centro di piscadonan aki na Aruba. Den e encuentronan a tuma nota cu ta un falta di informacion a conduci cu na cierto momento tabatin preocupacion grandi bou di e piscadonan pa locual ta trata e parke marino, cual preocupacionnan a keda atendi cu ne.
E reaccion di tur e reunionnan mas tanto tabata uno di cu tur hende kier pa tin proteccion y ta aprecia cu Gobierno ta consulta cu nan y ta ricibi nan ‘input’ pa e plan di maneho cu mester wordo traha. Minister Oduber a compromete cu e piscadonan pa ricibi nan input riba papel pa cual tur piscado a haya e oportunidad pa yena e formulario. Cada centro lo tin un representante cu lo haci un inventarisacion di e formularionan yena, pa por revisa e informacion pa e por bira parti di locual cu mester conclui den e plan di maneho pa e parke marino.
Un di e cosnan cu a vislumbra sigur ta e hecho cu tin un preocupacion grandi cerca gran mayoria (80%) di piscadonan pa locual ta trata piscamento cu reda na parti panoord di nos isla. A pesar di cu e area menciona no ta cay den un di e 3 zonanan indica cu ta pertenece na e parke marino, lo percura pa conhuntamente cu Ministerio encarga cu e aspecto di pesca pa reuni riba esaki. Pa mira kico lo por ta un maneho cu por bin pa e asunto aki cu tin gran preocupacion pe. Pa locual ta Harpoen cual tambe a wordo treci dilanti pa piscadonan durante diferente reunion, a bisa cu lo habri e posibilidadnan pa por tira pisca na un forma controla. Cierto pisca/especie lo bira parti di e maneho den e areanan di e parke marino pues cu esaki por wordo permiti of no. Tambe tin e compromiso cu e piscadonan cu e landsbesluit cu a wordo pasa door di Gobierno anterior cu tin e piscadonan rabia, lo percura pa e cambionan necesario den e landsbesluit aki pa por minimalisa e prohibicionnan den e ley ey.