Prome Minister su mensahe di video pa e conferencia di integridad na Corsou.
Diabierna siman pasa, Prome Minister Evelyn Wever-Croes a wordo invita pa un conferencia anual di Integridad na nos hermana isla Corsou. Pa motibonan di compromisonan na Aruba, e prome mandatario no por a presenta na e conferencia importante aki. Prome Minister tin integridad bou di su ministerio y lo a desea di a forma parti na e conferencia organisa pa Leading with Integrity Foundation (LWI) cua conferencia tawata un exito total. Invitadonan na e conferencia tawata entre otro Su Exelencia Gobernador di Corsou Lucille George-Wout; Presidente di Parlamento Sr William Millerson; Prome Minister Eugene Rhuggenaath; Su Exelencia Gobernador di St Maarten Eugene Holiday, Ministernan y Parlamentarionan di Corsou hunto cu representantenan di diferente compania i servicionan di Gobiernu for di Corsou, Aruba, Boneiro i St Maarten.
Pa e ocacion aki, Prome Minister di Aruba a manda su mensahe di video cu a wordo pasa durante e conferencia cu a hala hopi atencion y a ricibi hopi elogio y aplauso di tur presente.
Den su mensahe, Prome Minister a cuminsa pa gradici Leading with Integrity Foundation pa e invitacion ricibi pa ta parti di un conferencia asina grandi y a elogia tambe e organisadornan pa nan di dos conferencia anual di integridad y a desea nan tur clase di exito riba e dia. Tambe e mandatario principal a desea Gobierno y e comunidad di Corsou exito cu nan trabou y funccion den e caminda di integridad.
Na Aruba nos a caba di inicia e caminda pa integridad. Desde comiendo di Gabinete Wever-Croes, Prome Minister a enfatisa cu integridad lo tin prioridad halto den nos gobernacion. Esaki tawata tambe parti di nos acuerdo ‘Hunto pa Aruba’ pa forma e coalicion aki.
E prome paso pa logra esaki a wordo haci prome di october ultimo cu e instalacion di e Bureau di Integridad. Señora Amalin Flanegin ta encarga pa setup e bureau aki. Bureau di Integridad lo enfoca riba aumenta conscientisacion den empleadonan publico di loke ta acceptabel y loke no ta acceptabel na trabou. E bureau aki lo sirbi tambe como e linea di comunicacion na unda ciudadanonan di Aruba por entrega keho di violencia di integridad den departamentonan gubernamental. E bureau lo revisa e kehonan entrega y lo manda e casonan cerca Departamento di Recurso Humano of si tin implecacionnan financiero cu mester wordo investiga, cerca Centrale Accountants Dienst (CAD) of cerca Land Recherche si tin implicacionnan criminal.
Cu e maneho aki, Gabinete Wever-Croes ta spera di duna e siñal corecto cu Gobierno ta tuma integridad cu seriedad. Integridad ta haci lo corecto aunke niun hende ta mira. Esaki ta balornan cu nos mester pa mantene haltura.
Prome Minister a laga tambe un reflexion atras pa conclui su mensahe den e video:
“Nos mester puntra nos mes; Nos como Gobierno of empleadonan, of como mayornan, nos ta haciendo suficiente pa preveni violacionnan di integridad? Tin biaha e cultura di algun organisacionnan ta permiti empleadonan comete violacionnan di integridad. Pero e conducta aki no por keda sin wordo castiga. Pero esaki no ta suficiente.
Nos ta dunando suficiente instruccion y conocemento na empleadonan y na nos yiunan? Of nos ta lagando nan den demasiado scuridad? Tin un dicho cu ta bisa cu esun culpabel no ta esun cu ta comete e pica, sino esun cu ta causa e scuridad.
Varios pais ta lucha cu violacionnan di integridad. Mi ta convenci, cu den e lucha aki, nos mester traha hunto. Dos por haci mas cu un. Hunto Aruba y Corsou por logra hopi mas. Nos por trece e luz asina tanto necesario den e scuridad”.