Home Politics Menasa di sindicato di Elmar ta iresponsabel y extremo: GOBIERNO DIFINITIVAMENTE LO...

Menasa di sindicato di Elmar ta iresponsabel y extremo: GOBIERNO DIFINITIVAMENTE LO PERCURA CU LO NO BAHA CORIENTE Y PONE ARUBA PLAT

SHARE

 

 

 

 

 

Gobierno a tuma nota via prensa cu sindicato di Elmar ta menasa cu accion pa motibo di asunto di personal di Elmar. Gobierno ta lamenta e actitud aki profundamente. Accionnan na Elmar, na unda ta menasa cu baha coriente y pone Aruba plat ta accionnan extremo cu por wordo hustifica solamente den casonan excepcionalmente extremo.

 

Si sindicato tin un pregunta of problema tocante asuntonan di personal, e mester cana e caminda corecto y bati na porta di Directie di Elmar. Y si esaki no sali afo, ainda sindicato por bati na porta di Hunta di Comisario di Elmar. Sinembargo, e sindicato a dicidi di bay via prensa na una e ta manda un menasa cu lo pone Aruba plat. Esaki ta un acto hopi iresponsabel cu no por wordo tuma na serio.

 

Gobierno di Aruba, ni e mandatario encarga cu energia, Prome Minister Evelyn Wever-Croes, ta bay over di asuntonan di personal di Elmar. Den e caso aki, Gobierno di Aruba, ni e minister encarga ta na haltura di locual ta e problema tampoco. Ta via prensa a tuma nota di un menasa cu lo pone Aruba plat, cu ta un menasa directo pa pueblo tambe.

 

“E Gobierno aki ta un Gobierno responsabel y serio. Nos ta spera tambe responsabilidad y seriedad di nos ‘partners’ den tur nan accionnan. Sindicato difinitivamente tambe ta un partner

por lo tanto, nos ta spera accionnan responsabel y serio di nan parti tambe. Den e caso aki, Gobierno di Aruba no ta esun cu ta atende e tema di personal, Gobierno no ta atende cu e problematica cu e sindicato tin. Pero Gobierno difinitivamente lo percura cu lo no baha coriente y pone Aruba plat pasobra esaki ta haci daño na nos comunidad y na nos economia. Aruba ta enfrentando retonan grandi y ta solamente si nos mustra seriedad y responsablidad nos por sali afo y hunto brinda Aruba bienestar pa tur”, Prome Minister Evelyn Wever-Croes a duna di conoce.