Home Entertainment E temporada mas dushi pa nos muchanan Sinterklaas y Pietnan ta rumbo...

E temporada mas dushi pa nos muchanan Sinterklaas y Pietnan ta rumbo pa Aruba

Bo tabata bon mucha henter aña?

 

ORANJESTAD, Aruba: Henter aña muchanan tabata ansioso pa mira Sinterklaas y su Pietnan. Sinterklaas lo ta yegando APA den su barco dia 18 di November proximo. E barco di Sinterklaas lo yega pa 10:00am na e entrada tradicional di APA. Desde 9:00am e porta di APA lo ta habri pa muchanan, mayornan, welo y welanan, turistanan y henter comunidad di Aruba.

 

Despues cu Sinterklaas y su Pietnan yega, e lo saluda tur hende saliendo for di APA bayendo direccion pa Plaza Betico Croes. E ruta di e parada lo ta L.G.Smith Blvd, bay na man drechi, keda riba L.G.Smith Blvd, pasa dilanti Royal Plaza sigui bay ariba ruta straight pasa dilanti Talk of The Town pa termina na Plaza Betico Croes.

 

Durante e ruta lo tin un grupo di brommer di Harley compañando e parada. Tambe lo tin hopi Pietjes, kendenan lo ta repartiendo mangel p’e bon muchanan y sin lubida cu algun Piet lo bay ta haciendo show y lo tin hopi cos mas.

 

E evento na Plaza Betico Croes lo cuminsa pa 10:00am, unda cu pa 11:00am lo tin presentacion di canto y baile presenta pa diferente grupo hubenil y infantil. Tambe lo tin e famoso kids corner unda lo tin Dino Jump, carrousel, area di pinta cara, tentnan di cumindanan dushi y refresco pa kita sed, cotton candy, popcorn y hopi mas.

 

Instancianan envolvi pa organisa e Yegada di Sinterklaas ta Fundacion Sinterklaas, Departamento di Cultura, Marinierskazerne Savaneta, APA, Polis, Serlimar, DOW, Rode Kruis, Student Counseling Colegio EPI, Tropical Bottling Co., Elitte Productions, SETAR, Palm Tours, Aruba Bank y demas comerciante, kendenan tur aña ta aporta na e yegada pa ta un exito.

 

Comision Celebracion Dianan Nacional y Minister di Cultura ta invita tur hende pa yega na APA y presencia e yegada di Sinterklaas y su Pietnan. Pero tambe yega Plaza Betico Croes pa pasa un dia familiar agradabel.