Home » Cangreu Blauw tin su balor ecologico, nos mester protege!

Cangreu Blauw tin su balor ecologico, nos mester protege!

by Admin
0 comment 57 views

 

ORANJESTAD – E Cangreu Blauw ta pertenece na e clase di crustaceonan den e orden di Decapoda y e genero Cardisoma. Tur esakinan por zona hopi straño pero asina ta clasifica e diferente especienan pa haya sa e origen di nan antepasadonan.

E nomber scientifico ta Cardisoma Guanhumi. E ta un cangreu di tera, no di lama, y mayoria biaha di color blauw. Por aprecianan den areanan cerca di costanan mas tanto unda tin hopi matanan di mangel y cu e suelo ta humedo.

Den e relato aki Directie Natuur en Milieu kier ilustra con e Cangreu Blauw ta, unda nan ta biba, kico nan ta come, nan balor ecologico y e peligronan cu e cangreunan ta encontra.  

Por identifica e Cangreu Blauw pa e siguiente caracteristicanan: un casca hancho y rondo; e parti ariba di su casca tin un bulto halto di manera gerijs; su wowonan ta pijlo ariba di color preto; su tenglanan (pianan parti dilant) ora e yega adulto ta desigual; uno semper ta mas largo y mas desaroya cu e otro. Mayoria biaha e tenglanan ta dos biaha mas grandi cu su casca. E pianan parti patras ta 4 cada banda y nunca ta mesun largo. Nan size ora di yega adulto ta pa e machonan 52mm y e hembra por bira 53 mm.                                                                                   Nan colornan por diferencia un poco ora nan ta jong. Nan ta color maron, y den fase di transicion nan ta bira color biña of oranje. E hembra den temporada di pone webo ta bira geel of te hasta blanco. E cangreu tin un dimorfismo sexual (na unda ta reconoce si e ta macho of hembra) esaki kier men cu e machonan tin un abdomen cu un forma di e letter V of forma triangular. E hembranan tin e parti abou rondo y e parti abou casi cubri ful, te na e rand di su casca. E cangreunan hembra ta yega madurez di reproduccion den 4 aña. E hembranan ta carga e webonan bou di su curpa pa ongeveer 2 siman, prome cu e cana bay pa lama na unda e ta laga esakinan bay. Un hembra di 50 gram por laga mas o menos 10,000 webo cay. Asina cu e cangreu drenta awa di lama, e webonan ta los y bira larva.

E temporada di pone webo por sosode te hasta 4 biaha den un aña entre e lunanan di juli y december, ora di luna yen durante 2 anochi. E cangreunan por mustra di tin menos actividad den temporada di secura y nan holnan ta mas tapa y asina cu tin mas yobida nan ta bira mas activo y ta sali.

E cangreunan ta biba mas tanto den cercania di lama of costanan, den e ecosistema di e matanan di mangel na unda e tera ta muha y di lodo. Nan ta coba buraconan te unda nan ta haya suficiente humedad pa nan desaroyo normal. E cangreunan ta come: matanan cu a decomoposita den lodo of cu a bira moli; insectonan lastrero; scorpion di mondi; resto di parhanan, y otro bestianan morto.

E cangreu tin un balor ecologico halto pa e boskenan di e matanan di mangel cu tin na nos costanan. E conservacion di e Cangreunan Blauw ta crucial pa e preservacion di mangelnan, y nan ta organismonan cu no por keda afor di e candena di alimentacion. Nan ta yuda den e proceso di putricion di matanan y asina forma e suelo pa e crecemento di e matanan.

Claramente e cangreunan blauw ta na peliger na diferente momento di nan desaroyo. Un di e menasanan mas grandi ta hende. Den cultura di paisnan bisiña nan ta uz’e pa consumo y tambe pa comercio local. Esaki ta peligroso pa salubridad mirando cu no tin control di hygiena pa malesanan cu e especie por carga. P’esey mes hende No mester coi e cangrunan pa consumo. Pero tambe mester menciona cu door di desaroyo y trahamento di caminda sin tene cuenta cu crusamento di cangreunan, por limita nan di yega lama. Durante temporada di migra pa pone webo, e automobilistanan ta trapa e cangreunan na cantidad halto matando e hembranan cu ta carga cu webo pa bay pone. E pikimento di palonan (driftwood) na lama tambe ta stroba cremento di e cantidad di cangreunan. Na unda mayoria ta sconde den nan fase hubenil.

DNM ta suplica un y tur pa ta alerta, ya cu den e dianan aki lo bay tin crusamento di cangreunan blauw na Pos Chiquito. Sea asina bon di notifica nos inmediatamente via nos facebook page dnmaruba of yama 594-8706. Den e siguiente siman DNM lo saca informacion adicional tocante e esfuersonan pa cu e crusada di nos cangreunan blauw.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio