E baho mundo di droga na Aruba a haya palo Dialuna marduga, danki na e bon trabou di e boto di Kustwacht.
Eagle: Dialuna algo prome cu 1’or y mey di marduga, durante patruya e boto di Kustwacht ta logra intercepta un boto carga cu droga, esaki a sosode den lama pabou di Manchebo Beach Resort.
E boto cu e droga a mesora a wordo confisca y e 4 miembro di tripulante a keda deteni. Kustwacht a tow e boto hibe Savaneta Kemp.
Tambe a pidi pa patruyanan di polis di Noord tira bista canto di lama di Eagle cu Palm Beach pa motibo cu e boto cu e droga tabata bayendo direcion di Eagle of Palm Beach, High Rise area. Aparentemente na Beach tabata lo tabata tin hende ta wardando e cargacion.
Mesora a cuminsa un control riba tera den e areanan di Eagle Beach cu High Rise hotel na Palm Beach. Tambe polis maritimo a wordo pidi pa sali y controla riba lama, si por tin mas boto cu cargacion di droga of si por tin pakete di droga cu lo por a wordo benta den lama. Algun miya pafo di waf na Oranjestad, riba e radar di Kustwacht lo a señala un boto sospechoso pero despues cu Polis Maritimo a bay controle, tabata trata di dos piscado local.
Un Kust Surveillance so tabata activo Dialuna marduga, e tabata tin contacto cu Kustwacht riba lama y tabata controla na e costa cu cooperacion di algun patruya mas di polis.
Un Caminda cu menos ta spera eynan droga ta drenta nos isla, entre Eagle Beach cu High Rise Hotels na Palm Beach, cerca di e area turistico eynan tambe e traficacion di droga ta pasa. Sigur no lo ta prome biaha cu nan ta trece droga tera, den e areanan aki.
Danki na e boto di Kustwacht, a logra kita algun Kilo di droga cu tabata destina pa Aruba for di caminda prome cu a trece tera.
Aruba enberdad mester di un radar pa intercepta e tipo di botonan aki, no ta solamente helicopter, pero esaki tambe sigur ta haci falta na Aruba, paso e boto di Kustwacht no ta 24 ora den nos awanan teritorial pa controla. E radar ta pa yuda combati ilegalidad cu ta wordo treci Aruba for di lama. Ban spera cu pronto Gobierno keda cla cu esaki, paso e tambe ta un tool hopi importante cu lo por yuda combati e entradanan di ilegalnan, di droga, di arma etc.
