Mi persona por a tuma nota cu partido AVP y nan lider Mike Eman a cuminsa un biaha mas cu e politica anticua di trata na susha imagen di politiconan den e caso aki parlamentarionan cu a bin ta haci nan trabao manera mester ta. Na momento cu mi a drenta parlamento, mi a bisa di lo haci cosnan diferente unda cu nos lo haci lo maximo pa e organo mas halto di Aruba, esta parlamento gana e respet bek di pueblo den bista cu e organo aki a bira un berguensa debi cu no a haci nan trabao manera mester ta. Un di aspectonan cu nos a pone hopi enfasis riba dje ta e aspecto di integridad. Si bo kier controla gobierno, no solamente esaki mester pasa door di e poder di controla presupuesto, pero tambe den ancra leynan di integridad cu politiconan, ministernan, parlamentarionan tin di tene cuenta cu esakinan pa por garantisa bon gobernacion, transparencia y integridad. Nos a traha dos ley importante cu ta den nan fase final, cu ta e ley di control financiero di partidonan politico y screening/ integridad di ministernan, unda cu como politico pero tambe como minister y cu ta conta tambe pa parlamentario, bo mester tene bo mes na ley y pa no tin un free for all mas. Banda di esaki pa fin di luna lo pasa e Aanbestedingswet cu lo controla y regula e destaho publiconan y a institui un camber di integridad cu tin e tarea primordial pa controla gobernantenan den procedernan y tambe pa conscientiza e cuerpo di ambtenaarnan cu nan tin di traha segun ley y procedura y ta consciente di e consecuencianan di no haci esaki manera un bon ambtenaar mester por haci. Nos no kier mira casonan bergonsoso mas manera tabata e caso di ex Minister Paul Croes y tampoco nos no kier wak abuso pasa mas cu terenonan bou maneho di ex minister di infrastructura Benny Sevinger.
Politica di porco y shisheria
Pero ora no tin argumento mas ta bay na purba desacredita hendenan y atacha nan imagen. Nos por a wak cada bes con ta yama nos pa Gayito, nos ta hole inky etc, pero cu no ta haci nos nada debi cu nos ta haci nos trabao manera mester ta cu ken gusta of no. Pero lamentabel ta cu nos di Fraccion MEP a bisa pueblo cu nos lo hiba un manera diferente di hiba politica y uno unda cu si abo como politico a haci algo robes lo mi bati bo cabes pabo, pa motibo cu abo ta responsabel pa bo actonan, pero nos a bisa tambe cu nos no lo hiba e politica di porco cu AVP a hiba e ultimo 17 añanan unda tur dia ta lanta insulta mama, tata, ruman, omo, tanta, yiu, nieta di contrincantenan politico, pasobra nos ta haya esaki un kiebro grandi den privacidad di un ciudadano. Y sigur nos no lo hiba e politica porco y di shisheria di AVP cu e unico proposito pa yega na poder cueste lo cueste y mi ta spera pueblo por bira mas consciente di esaki. Y sigur pueblo ta wak con nos ta dirigi nos mes na parlamentarionan y ex ministernan manera Mike Eman, pero ningun momento nos ta bay den nan casa, yiu etc pasobra nan no tin culpa. Ta e doño di curpa ta responsabel pa su actonan y sigur nos no lo hinca ningun yiu pasobra nos ta hendenan cu respet y sigur den mi trabao e derecho di mucha ta sagrado.
Un biaha mas a cuminsa cu difamacion y bay den bida familiar
Por a tuma nota di un ex parlamentario cu no por laga bay cu e no ta parlamentario mas y keto bay den conferencia di prensa y den relato ta indica cu su persona ainda ta parlamentario. Tristo pa wak cu ainda Melvin Tromp ta den un crisis di identidad, pasobra e no sa si e mester bay traha bek na CEA, e ta soña di ta fractie medewerker of parlamentario, pero cu ta bisto cu e mester ayudo psicologico urgente pa yud’e cu su problema. Mi por a scoge pa yam’e na su nomber di cariño pero mi persona no ta hacie pasobra p’ami lo mi ta insultando e animal cu nos conoce como burico y sigur ta un animal hopi inteligente.
Mike Eman a manda Melvin Tromp pa un biaha mas bin dilanti y difama hende y den e caso aki lider di fraccion Rocco Tjon bayendo den su bida personal, tratando di atacha su imagen y integridad. Mi sa cu sr. Tjon lo sa di defende su mes pero ta lamentabel cu AVP un biaha mas ta recuri na mesun manera di hiba politica manera nan a lastra Nel Oduber y famia, Evelyn Wever-Croes y famia, y awe nos ta wak un biaha mas sin prueba ta bin dilanti y purba atacha imagen di hende. Si sr. Tjon tin asina cos riba dje ta con su screening via Veiligheidsdienst VDA por a sali bon cu gobierno di AVP mes a nombr’e como director di KIA, con su screening por ta asina malo cu a paga su estudio cu Marlon Sneek ta referi na esaki, con ta posibel cu Mike Eman a elogia sr. Tjon asina tanto?
A yega ora pa e cosnan infantil aki ta pa pasado y no tin espacio pa e tipo di politica anticua di bay den bida personal y touch mucha den caso aki pasobra nos tin hopi reto nos dilanti pa saca Aruba di e desaster cu otronan cu ta pretende di ta awe e Santonan for di dje, pa por garantisa nos futuro generacionnan un mihor biba riba Aruba.