Diasabra mainta a tuma luga un congreso na Renaissance Conference Center riba e tema abuso di mucha, ‘Break the silence’. E congreso a wordo organisa pa Dr. Horacio E. Oduber Hospital. Den su discurso, Prome Minister Evelyn Wever-Croes a confirma e compromiso di Gabinete Wever-Croes pa haci tur lo posibel pa duna nos muchanan proteccion.
“Mi ta comparti e speransa cu e congreso aki forma un paso importante pa crea un miho sistema pa loke ta trata e cuido di muchanan y nan famia cu ta bira victimanan di abuso di mucha. Bin hunto pa discuti e problema grandi aki ta un paso hopi importante pa comparti experencia y conocemento cu e mucha central.
Desde november 2017, e panorama na Aruba a cambia. E morto cruel di dos angelito a trece un punto di reflexion y cambio na Aruba. Aunke pa e profesionalnan na Aruba, esaki no a trece cambio pasobra nan ta wak y biba e crueldadnan aki regularmente. Pa e victimanan tampoco, pasobra desde november e casonan aki no a bira menos. Pa e violadornan tampoco pasobra nan tampoco a bira menos y nan no ta haya castigo halto tampoco. Sinembargo, toch esaki a trece cambio pasobra un persona por reconoce e problema y e seriedad di esaki y no por nenga e problema mas.
Gabinete Wever-Croes no ta inverti solamente den embeyecimento di e isla pero ta inverti den e parti social y asina pone e mucha central. E problema di abuso di mucha tey y ta birando menos taboe den Sociedad. Dus nos por papia di un cambio cu ta tumando luga y esaki ta pa di e prome biaha cu e tema y maneho di abuso di mucha ta asina halto den un agenda politico na Aruba.
Gobierno a instala un crisis plan social na unda e aña aki a pone riba presupuesto 17 miyon florin y pa otro aña a presupuesta 18 miyon florin. Esaki tambe ta e prome biaha cu un suma grandi a wordo inverti den e veld social. Por ta tin diferencia di opinion si e ta suficiente of no pero sigur nos por ta di acuerdo cu e ta un paso importante y den bon direccion.
Tambe Gabinete Wever-Croes a inicia un investigacion pa examina e proceduranan di trabou di tur instancia cu ta involucra den proteccion di nos muchanan pa averigua y comprende exactamente con algo asina cruel por a pasa y con e situacion a yega asina leu cu dos criatura a perde nan bida. Tambe e investigacion lo inidica nos cuanto mucha mas tin den un situacion asina na unda cu ainda algo por wordo haci pa nan.
Ainda nos no ta caminda nos mester yega pero tur e pasonan cu Gabinete Wever-Croes a tuma ta den e bon direccion pa proteha nos muchanan y pa obtene e resultado aki, nos tin mester di tur hende” asina Prome Minister a duna di conoce den su discurso durante e congreso ‘Break the Silence’.