Home Politics Parlamentario Sue-Ann Ras: “Conseho di Alumno di Filomena College Mavo ta e...

Parlamentario Sue-Ann Ras: “Conseho di Alumno di Filomena College Mavo ta e prome paso pa crea mas lider den futuro”

 

 

 

Aña escolar 2017-2018 e team dinamico di Filomena College Mavo a dicidi pa inicia cu su prome Conseho di Alumno di Filomena College Mavo, bou di e nomber di Filomena In Actie (FIA) y diabierna ultimo, e conseho di alumno actual a baha y duna bonbini na e conseho di alumno nobo. Parlamentario Sue-Ann Ras (MEP) tabata presente na e momento aki, durante su bishita regular na dicho scol y a presencia y hiba algun palabra durante e ceremonia. Aña pasa mes durante tratamento di presupuesto, e Conseho di Alumno tabata di bishita na Parlamento, p’asina presencia un reunion publico.

META FIA

E meta di FIA ta pa haci entre otro e alumnonan mas consciente cu nan ta coresponsabel pa mantene un bon ambiente na scol. FIA tambe ta fungi como propaganda pa e scol y Filomena College Mavo ta te awo, e unico scol secundario cu tin un Conseho di Alumno. Loke cu e alumnonan cu ta forma parti di FIA ta haci entre otro ta; bin cu idea leuk y creativo pa e actividadnan di scol, organisa mini recaudacion di fondo y cera conoci cu e otro hobennan cu tambe ta yuda activamente na nan scol. Banda di e excursionnan  educativo tambe tin tayer p’e alumnonan di diferente topico. “E programa ta uno extenso y ta pone relacion cu loke e alumnonan ta encontra den nan comunidad. Ta importante pa nos inculca y sostene e actividadnan cu ta yuda nos hobennan ta mas consciente di tur loke ta pasa rond di nan y ki impacto y funcion nan como hoben tambe tin den nos comunidad,” Ras a indica.

 

CREANDO FUTURO LIDER

E formacion y e competencianan di e lidernan di futuro ta esencial den e fase di hubentud. P’esey independientemente cu si un persona ta posee un don natural pa lidera, ta di sumo importancia pa desaroya y duna potencia na e habilidadnan aki, pa comberti nan den un berdadero lider.  “Mirando tur e retonan social, educativo y economico cu nos tin actualmente, ta importante pa nos crea mas posibilidad pa nos hobennan adkiri e conocemento- y experiencianan necesario pa triunfa den e era aki y asina bira ciudadano responsabel, resiliente y sostenibel. Hopi exito na e team dinamico di Filomena College Mavo y e alumnonan nobo di Conseho di Alumno 2018 – 2019,” Ras a termina bisando.