Home » Parlamentario Edgard Vrolijk (MEP): “Miedo di tende realidad tabata e motibo cu Richard Arends no tabata presente den e prome reunion di comision fiho di NV’snan”

Parlamentario Edgard Vrolijk (MEP): “Miedo di tende realidad tabata e motibo cu Richard Arends no tabata presente den e prome reunion di comision fiho di NV’snan”

by Admin
0 comment 39 views

 

 

Siman pasa nos tabatin nos prome reunion pa locual ta trata e comision fiho di NV’snan den parlamento.  Pa cu esaki nos a yama Prome minister Evelyn Wever-Croes p’asina e por bin duna nos su vision y tambe su maneho pa locual ta nos NV’snan, pero tambe nos a haci uso di e oportunidad di haci preguntanan referente e situacion di WEB, ELMAR y Utilities. Lamentablemente e fraccion cu mas ta haci bochincha no tabata presente na e reunion aki unda cu nos a toca e tema entre otro di e carta cu sr. Marlon Sneek tabata insinua, y tambe nos a trata e tema di consultancynan y inversionnan realisa durante Gabinete Mike Eman 1 y 2 y ki ta e pasonan cu lo tuma cu esakinan.

 

Ta comprendibel pakico AVP no tabata presente

Sigur miedo di tende realidad kisas tabata e motibo primordial pa no tabata presente y principalmente Richard Arends. Sr. Arends desde comienso di Gabinete Eman 1 y 2 tabata e consehero principal di Mike Eman riba tereno di finanzas y economia y despues el a bira Minister di Economia di 2016 pa 2017 bou Gabinete Mike Eman 2. Richard Arends tabata e persona cu tabata tras di Mike Eman p’asina por a usa e formula economico di Paul Krugmann unda cu ta stimula bo economia door di fia, pero den e caso aki a keda fia y fia pero gastonan a sigui aumenta, mientras nos economia na 2015 y 2016 a conoce contraccion (caida). Mas tristo ta cu tabata basa nan mes riba crecementonan economico desproporcional, cu a haci cu awendia nos tin un debe di 90% di nos GDP y cu na 20009 tabata den careda di 40%.

 

Richard Arends a strica bay off

Parlamentario Richard Arends a haci mal uso di su poder como consehero principal di Mike Eman, pa por a previlegia y tambe enrikece su mes. Tur esaki a pasa bou nanishi sea ta cu conscientisacion di Mike Eman (cu ta muestra di debilidad como un lider) of  e no tabata al tanto door di tur e biahenan rond di mundo y cu a laga tur cos den man di Richard Arends. Richard Arends no tabata contento cu su salario pa luna como consehero (cu segun Solo di Pueblo tabata core den careda di 25 mil florin pa luna) y a cambia su contracto di trabao den uno di consultancy bou di e nomber Horizon Consultancy NV unda cu Richard Arends himself tabata na cabes di esaki como director. Su persona a cobra gobierno den un periodo cortico 445.000 florin, pero esey no tabata suficiente pe, pero el a haci mal uso di su poder y kisas di tur e jetlagnan di Mike Eman y a drenta nos NV’snan unda cu den Utilities so el a strica 574.000 florin. Tambe el a strica di WEB y ELMAR pa locual ta trata organisacion di Green Conference.

 

Mas sorpresa pa pueblo

Ora cu a kere cu locual el a strica tabata den Utilities, WEB y ELMAR so, pa nos sorpresa a cay den nos box un documento y mi persona a haci pregunta caba riba esaki y awor ta wardando riba contesta, pasobra mi kier ta sigur di e caso y no kier specula. Sin embargo mirando e echo cu Richard Arends ta sigui papia su barbaridadnan y ta sigui pretende di ta San Richard, mi ta pone tentativo locual mi a haya en espera di e contestanan riba mi preguntanan. Richard Arends a probecha haciendo mal uso di su poder pa for di RDA na 2016, for di documentonan cu a cay den mi box ta indica cu Horizon hunto cu Richard Arends a strica 2999,791,50 florin (casi 3 miyon florin!) for di esaki. Na 2017 e mesun consultancy aki pero cu Richard Arends como minister a cobra RDA 114.160.50 florin y na 2018 ainda a cobra 31.050,00 florin cu ta suma un total di 445,002,00 (casi mey miyon florin). Richard Arends a probecha y a saca di nos NV’snan y tambe di caha di pueblo mas di 3 miyon florin den un periodo cortico y awendia cu su cara bunita kier pretende cu ta e gobierno aki ta causante di tur cos malo. Si Richard Arends tin un tiki dignidad awe e lo tuma retiro como parlamentario pasobra un persona cu a abusa di su poder pa mal usa placa di pueblo na su fabor pa enrikece su mes, mester tuma honor na su mes y retira.

 

Pa termina mi tin di bisa cu pueblo completo sa di awor cu Richard Arends no lo tuma su retiro, pasobra e exigencianan pa bo ta parti di AVP ta cu bo mester ta un persona  cu no conoce integridad, pues un persona sin dignidad y sigur un persona cu ta dispuesto pa haci tur cos contra di regla pa faborece su mes y cu sigur bo ta wak e bek den e reclutanan pa candidato nobo pa AVP, ya cu esaki ta indicabo con bo mester ta pa ta forma  parti di AVP, pues crioyo bisa: “mas sinberguensa, mas mihor bo ta pa AVP”.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio