Oranjestad: Durante un conferencia di prensa diasabra merdia tanto Minister di Husticia mr. Andin Bikker como Prome Minister di Aruba Sra. Evelyn Wever Croes a informa comunidad despues di a tene un briefing urgente di loke a sosode na Colony.
Segun Minister di Husticia mr. Andin Bikker, cu entrada di e boto y morto di dos persona por subraya e problemanan cu ta tumando luga na pais bisiña Venezuela y cu ta afecta Aruba directamente.
Despues di hopi tempo sin precedente diasabra ta bin haya dos persona cu tragicamente a fayece den e intento pa yega Aruba. Segun e mandatario, tur esaki ta bou di investigacion despues cu un boto a yega costa, dos persona a fayece, tres deteni y tin indicacion cu e boto tabatin mas persona riba dje. Mientras cu e investigacion ta tumando luga por spera cu den proximo ora y dia lo por detene mas persona.
Manera ta conoci prome di october a cuminsa e proceso pa yega na un servicio pa lease un helicopter y pa e caso di diasabra Aruba a haya asistencia di kustwacht su helicopter. Diahuebs ultimo Minister Bikker tabata na Corsou unda el a presencia e reunion di presidium di kustwacht. Di parti Aruba a haci apelacion pa mientras tanto cu ta warda pa Aruba su lease di helicopter, Aruba tin derecho riba oranan pa uza kustwacht su helicopter.
Segun Minister Bikker esaki no solamente pa helicopter pero tambe pa e dash pa contra aresta e acontecimentonan aki sin precedente cu pais Aruba ta pasando door di dje. Tambe durante conferencia di prensa Minister Bikker a anuncia cu pronto lo bay trata e aanbesteding verordening nobo cu por yuda e proceso mas lihe pa ora tin demanda riba ekiponan cu mester bin por ehempel e helicopter y tambe radar.
E situacion ta algo hopi preocupante y na mesun momento tragico pasobra por wak con bidanan ta bay perdi den e procesonan aki y cu ta hopi lamentabel. Vigilancia di costanan tin atencion di gobierno y tambe e parti humanitario unda personanan ta fayece.
Pa Minister Bikker esaki ta algo di lamenta den tur sentido y cualkier circunstancia. Tur departamento cu ta regarda siguridad di fronteranan ta presenta pa sigui vigila y monitor e situacion di cerca.