ORANJESTAD, Aruba – 16 di October 2018: Refereenan di Arubaanse Voetbal Bond (AVB) a topa cu e instructor di fitness di CONCACAF, Allan Brown, cu a conduci un test fisico na esunnan cu ta carga maximo autoridad riba veld durante un wega di futbol. E aña aki 7 referee a participa na e test di cual AVB tabata contento cu 4 referee a sobresali.
E biaha aki tabatin 2 referee cu a pasa e test di FIFA Referee y 2 di Assistent di Referee di FIFA. Oslin “Oshi Kock”, Head of Referee, ta corda cu tempo e tabata Assistent Referee, tabatin 4 Referee cu a pasa e test di cual 1 tabata Referee y 3 Assistent di Referee. Pa AVB y e Refereenan, esaki tabata algo historico, pasobra pa prome biaha tin un team di Referee cu a pasa e test. Pa logra haal e test no tabata algo facil, pero a logra y Aruba tin un team.
Asina cu un persona bira Referee di FIFA, e ta riba e nivel internacional unda cu nan por haya un asignacion pa bay afo. Allan Brown a informa e Head of Referee cu e mes a manda tur informacion di e 4 Refereenan pa Brian Hall, Referee di CONCACAF pa asina nan por ta den e panel di FIFA 2019.
E refereenan cu no a logra haal pa ta den e lista di FIFA 2019, mester train pa nan nomber por ta den e panel di FIFA 2020. “Hopi hende ta kere cu Referee ta djis yega veld core, fluit y bay cas. Pero no ta asina”, Oslin Kock a expresa. Refereenan tambe ta train hopi duro.
E aña aki tabata uno hopi fructifero pa Refereenan, pasobra nan tin 11 luna ta trahando cu Fitness Instructor Zoraida de Nobrega cu a yuda hopi Referee. No ta tur Referee tin e mesun ambicion pa bay riba e lista di FIFA, pero esunnan cu a bay riba e lista a traha duro pa esaki. Nan a prepara hopi bon, pasobra tur cos ta training, come bon y mentalmente pasobra e no ta facil.
Tur aña Refereenan tin cu pasa e test. Pero esaki a cambia, pasobra te cu 2 aña pasa mester haci e test 4 bes pa aña. FIFA a cambia esaki y awo ta haci 1 test oficial. E aña aki den luna di April e Refereenan a pasa un test di FIFA cu resultadonan bon pero no tabata oficial. E test oficial tabata esun haci cu e instructor di fitness di CONCACAF Allan Brown.
