Minister di Finansa, Asuntonan Economico y Cultura a presenta 6 Sector Prometedor
ORANJESTAD – Durante e conferencia semanal di Gobierno di Aruba, Minister di Finansa, Asuntonan Economico y Cultura, Sra. Xiomara Ruiz –Maduro a informa cu Gobierno pa di prome biaha den historia a traha riba un Vision y Plan Economico pa Pais Aruba. Alaves a presenta 6 sector economico prometedor. E sectornan prometedor ta sectornan economico cu tin un potencial fuerte pa wordo desaroya pa diversifica nos economia y atrae inversionista local y internacional. Gobierno lo ta e facilitador pa stimula e sectornan prometedor y lo bini cu incentiva pa haci e accionnan bira realidad; pa duna nos economia un ‘push’.
Minister di Finansa, Asuntonan Economico y Cultura. Sra Ruiz-Maduro a splica cu e vision economico di Gabinete Wever – Croes ta un vision basa riba un economia cu un fundeshi fuerte y resiliente. Nos economia mester ta fuerte pa por recupera y crece bek. Nos economia mester ta resiliente pa motibo cu como nos ta un pais chiquito nos ta mas vulnerabel cu paisnan grandi pa desaroyonan internacional. Nos mester traha riba condicionnan pa traha un fundeshi solido y cu proceduranan pa si algo pasa internacionalmente, nos por lanta bek.
E vision y plan economico integral ta basa riba e siguiente areanan: baha costo di bida, crea un finansa publico solido y manehabel, stipula un maneho pa stimula comerciante, stimula un maneho di exportacion, alavez stimula un maneho macro economico y tambe un maneho di inversion.
Como parti di e vision y plan economico, Gobierno kier a explora tambe riba ideanan innovativo; oportunidadnan cu tin ainda cu por yuda nos economia pa por crece.
Pa e motibo ey na mei ultimo, Gobierno a invita un facilitador di Irlanda, Colm Reilly kende ta un experto pa guia nos defini e sectornan prometedor. Durante di un proceso participativo cu stakeholder di sector publico y sector priva a identifica seis sector prometedor, cu tin potencial pa contribui na un desaroyo di economia sostenibel di Aruba.
E rol di Gobierno ta pa facilita e sector priva pa uza e potencial completo di e sectornan aki; alavez Gobierno lo brinda incentivonan pa e accionnan bira realidad y asina duna un ‘push’ na nos economia.
E seis sectornan prometedor cu a ser identifica ta den sector di turismo, sector di economia basa riba conocemento, sector di agricultura, sector logistica, sector di economia circular y sector di industria creativo. Den cada un sector e stakeholdernan di sector publico y priva a bini cu algun areanan prometedor.
Pronto Departamento Economico lo amplia e grupo di expertonan cu ta formula e plan economico y lo reuni cu e stakeholdernan cu ya a participa caba, pa explora locual lo bay bira e oportunidadnan den cada area. Alavez lo bay identifica kico Gobierno di su banda mester haci pa bini cu incentiva pa por yuda e sector priva.
Gobierno a busca un facilitador internacional pa guia den e proceso pa defini e sectornan prometedor, pero ta keda na accionnan di tanto Gobierno y e mundo di comercio pa asina hunto por haci e meta di e seis sectornan prometedor, un realidad.
Di parti di Gobierno nos lo continua cu e trabounan y lo sigui haci e vision y plan economico mas coherente y lo mantene nos comunidad informa tocante e desaroyo di esaki.