Melvin Tromp di partido AVP, diahuebs mainta den un conferencia di prensa a cuestiona e silencio hermetico cu tin riba e supuesto caso di un sentencia di Corte di e representante di Aruba na Bruselas.
Ta trata di un asunto cu a wordo publica den medionan di comunicacion y Tromp ta haya, mirando e seriedad di e caso aki, pa haci e preguntanan necesario riba e tema aki.
Ta importante pa haci pregunta ya cu e ta cay bou di e mesun tema di Integridad cu tanto politiconan di MEP ta papiando ariba.
“Si kier pap[ia bunita ora di punta dede, mi ta kere cu ta na su luga pa tambe papia di e propio seno cu abo, Rocco Tjon, lider di fraccion di MEP, ta forma parti di dje.
Un representante di pueblo, un persona cu tin un encarga na Bruselas, kende ta forma parti di Gabinete Wever Croes, tin un sentencia contra dje den un caso entre su persona y un banco local. Supuestamente e sentencia aki ta papia di sumanan cuantioso, suma di riba 600 mil florin. Mester tin un motibo pakico e caso a yega di e leu aki, pero nos ta mira cu tin un silencio hermetico den e asunto aki di parti di partido MEP.
Ningun hende ta papia di e tema aki y ta nos deber pa haya sa kico ta tumando luga y pa e pueblo tambe por huzga pa su mes kico a pasa den henter e caso aki.
Pueblo tin derecho pa sa kico ta problema cu a yega te na un sentencia di Hues,” Melvin Tromp a señala.
E politico a lesa e noticia cu a keda publica y unda ta menciona e persona aki ta Eddy Paris, kende ta e represenante di Aruba na Bruselas.
Ta menciona cu ta trata di ex doño di trabou di Paris, un banco local, unda cu el a finalisa den un caso civil. Mirando cu e persona aki ta representante di Aruba na Bruselas, Tromp kier haya sa pakico te awe, 3 pa 4 siman despues di e sucedido (sentencia), no tin niun idea di e caso aki. “Extraoficialmente a tende algo di manipulacion pa cual a dicidi di bay Corte y e sentencia a sali na fabor di banco y cu Paris mester paga e suma cuantioso aki bek.
Si ta punta dede riba tur hende y ta papia di integridad, di con te cu dia di awe Gabinete Wever Croes no a duna comentario riba e asunto aki. Con ta posibel si Paris a wordo haya culpabel den e problema, di con te awe, no a tuma accion contra e persona aki, mas ainda si ta papia di Integriteitskamer cu kier bini cun’e.
Mi ta kere cu no ta reacciona simplemente pasobra kier defende e partido y un persona. Nos ta haya esaki algo di lamenta pasobra ora bo kier predica algo, bo kier Parlamento integro y Ministernan integro, e ora pakico ta sconde e berdad di e noticia di Eddy Paris.
Gobierno ta “muisstil” den henter e asunto aki, nan kier crea smokescreen riba otro politico pero den nan propio seno ta pesta di hende cu falta di credibilidad y maldad.
Pesey ta importante pa lider di fraccion di MEP, sr. Tjon cuminsa haci investigacion den su propio seno pero AVP si lo percura pa trece esaki, punto pa punto dilanti.
Corda bon, si bo kier papia di credibilidad y integridad, cuminsa na bo mes,” sr Melvin Tromp a declara.