E DI 4 DIASABRA DI LUNA DI SEPTEMBER A WORDO DECRETA COMO DIA NACIONAL PA PERSONANAN CU DEFICIENCIA AUDITIVO.
Señora Stella Monsanto y señora Gladys Kock di Fundacion FEDDA a haci un presentacion di e trabounan di e fundacion den Ministerraad. FEDDA ta e fundacion cu ta traha pa esnan cu problema auditivo. E representantenan di FEDDA a entrega tambe un peticion cerca Minister President Evelyn Wever-Croes p’e decreta e di 4 diasabra di luna di september como Dia Nacional pa Personanan cu Deficiencia Auditivo.
Siman pasa Gobierno di Aruba a tuma e decision riba proposicion di Minister President pa honra e peticion di FEDDA y decreta e di 4 diasabra di september como e dia cu nos ta para keto na personanan cu tin problema cu oido y habla.
“Cu esaki Gabinete Wever-Croes ta enfatisa cu ta hopi importante pa crea conscientisacion pa e handicap invesibel aki. Pasobra hopi biaha personanan cu ta sufri di deficiencia auditivo no por wordo reconoci di leu. Na mas di un ocacion nos a mira cu hendenan ta wordo zundra sin cu a ripara cu nan tin problema di oido”.
Prome Minister ta enfatisa e necesidad pa crea mas conscientisacion pa nos hendenan cu deficiencia auditivo. Pero tambe nos mester crea mas oportunidad pa nan tanto den enseñansa pero especialmente den e mercado laboral. Pa esaki, Gobierno di Aruba ta evaluando un maneho nobo den cual ta incentiva doñonan di trabou cu ta duna trabou na esnan cu un of oro limitacion incluyendo esnan cu problema auditivo.
Gabinete Wever-Croes ta felicita FEDDA y cu gusto a decreta e di 4 diasabra di september como Dia Nacional pa Personanan cu Deficiencia Auditivo.
“Mi tin un luga hopi special den mi curason pa esnan cu tin problema di oido y habla. Esaki ta un area cu mi trahando den dje pa hopi aña a trabes di trabounan caritativo. Ta importante pa aumenta conscientisacion den nos comunidad pa tur hende ta consciente cu mester cuida oido pasobra nos oido ta conecta nos cu e resto di mundo. Y esnan cu tin un deficienca auditivo tambe merece tur oportunidad di empleo y di educacion cu nos por brinda nan”, Prome Minister a duna di conoce.