E CAPITULO DI INTEGRIDAD.
Corupcion ta costa placa. Paisnan ta perde 5% di nan GDP debi na corupcion. P’esey nos mester combati corupcion na Aruba tambe. Esaki ta un motibo mas pakico nos mester traha riba integridad! Un aña despues cu Gabinete Wever-Croes a cuminsa cu e procedura pa forma Gobierno pa un gabinete nobo, Gobierno di Aruba a organisa un conferencia hopi importante pa hefenan di departamento, hefenan suplente di departamento, y pa funcionarionan encarga cu recurso humano den departamentonan di Gobierno. Na e ocacion aki, Prome Minister Evelyn Wever-Croes a duna un discurso na apertura di e conferencia.
“For di formacion di Gabinete Wever-Croes te cu awe, pa e partidonan politico MEP, POR y RED, integridad ta un di e puntonan importante den nos programa di gobernacion. Sinemembargo, pa Prome Minister Evelyn Wever-Croes ya desde 2014 cu e tawata Parlamentario y den oposicion a skirbi un nota titula ‘Integriteit, het juiste doen, ook als niemand kijkt’. ‘Integridad, haci lo corecto hasta ora ningun hende ta mira’. E meta ta pa pone e tema di integridad como un punto di discucion.
Violacionnan di integridad ta un fenomeno cu a toca Aruba tambe. For di un estudio haci pa un studiante na Hulanda tocante violacionnan di integridad den politica den e ultimo añanan di tur continente di mundo, a sali afo un lista di 22 caso. Entre e casonan aki tin corupcion, mal maneho financiero, uzo di fondonan publico pa asuntonan priva y fraude cu tarheta di credito, mal conducta sexual, prostitucion y pedofilia, interferencia cu resultadonan electoral, falta na derechonan humano, y retiro di titulo doctoral door di falsificacion.
Esaki ta e motibo cu Gabinete Wever-Croes a tene e conferencia di Integridad. Violacion den integridad no solamente ta wordo mira rond mundo pero tambe na Aruba. Pero nada mester impedi nos pa garantisa cu e violacionnan di integridad nunca mas pasa na Aruba. Nos mester sigui cu curashi pa alcansa e meta aki.
E comunidad di Aruba a perde confiansa den politica y den Gobierno pa motibo di demasiado violencia di integridad cu a wordo tapa. Gobernantenan a bira cara pa violencianan di integridad. Y esnan den e aparato gubernamental cu si a para pa integridad, no a wordo apoya.
Pa e motibonan aki y pa hopi otro motibo mas, pa Gabinete Wever-Croes integridad ta central den e gobernacion aki. Y nos ta den e bon caminda. Awe nos ta skirbi un capitulo nobo den historia di nos pais. Y Aruba henter ta e protagonistanan. Laga nos semper wordo guia door di integridad, laga nos semper haci lo corecto hasta ora ningun hende ta mira”, Prome Minister Evelyn Wever-Croes a enfatisa.