Oranjestad, Aruba: Durante conferencia di prensa, parlamentario Sue-Ann Ras di fraccion di MEP a toca un topico un poco controversial y cu ta un situacion cu sigur mester haya tur atencion. Ta trata di e balor cu nos como Arubiano ta duna na arte y cultura y kico realmente ta su nificacion den desaroyo di nos sociedad.
CONGRESO C100
Durante e congreso di diabierna di C100 na Cas di Cultura, por a presencia e presentacionnan di varios orador, cu a bin cu un reflexion constructivo, tocante con nos ta anda hipocritamente cu arte y cultura na Aruba. “Nos no ta haci arte y cultura accesibel pa nos muchanan y nos hobennan y nos mes ta menosprecia tur loke ta encera arte y cultura. Un ehempel cla ta nos celebracion di 18 di maart, unda cu tin varios composicion unico, cu ta papia di balor, amor, pa nos cultura, musica, idioma etc. pero despues di 18 di maart, tur amor patriotico ta desaparece y ta bay den lachi,” Ras a indica.
CURICULO DI ENSEÑANSA
Si nos compara nos curiculo di enseñansa nacional, ta tristo pa bisa, cu no ta duna e materianan di arte e lugar cu nan merece, manera ta e caso na otro pais. Loke ta e famoso ‘hoofdvakken’, esta matematica, lesamento y/of Hulandes, hopi biaha ta haya prioridad den transcurso di dia, ya cu ta uza e momento di e lesnan expresivo, pa termina loke no a logra. Como mayor tambe hopi biaha nos ta uza como metodo di straf, pa kita sea deporte of actividad expresivo di nos yiunan, mientras cu sigur tin otro forma pa haci esaki.
“Mi ta haci un apelacion na Departamento di Enseñansa y Minister Lampe, pa realmente nos duna balor na arte y cultura den nos enseñansa. E problematica di desaroyo emocional y social di nos mucha-, hoben- y adultonan, sigur por tin cierto relacion cu e falta di arte y cultura den nos sistema di enseñansa como tambe den nos comunidad. Arte ta un facultad cu ta mehora calidad di bida, ya cu e ta un herment potente pa impulsa desaroyo emocional y intelectual,” Ras a sigui bisa.
EDUCACION ‘OUTSIDE THE BOX’
Ta yega momento pa nos cuminsa pensa ‘outside the box’ y haci uzo di nos baluartenan den arte y cultura y envolve nan mas den educacion. Nan por comparti nan experiencia y conocemento y esaki sigur lo tin un efecto hopi positivo riba nos alumnonan. “Nos tin cu haci algo y ta creativo, pero responsabel, pa brinda nos mucha- y hobennan un desaroyo total, no solamente forma hende cu por haci ‘rekenen y taal’, pero cu tambe por ta expresivo y descubri su talentonan total. Imagina cu ami como docente cu no por toca instrumento musical, tin e deseo si pa hacie, pero mi ta limitando mi alumnonan, cu kisas si tin e talento, gana y pasion, door cu mi no por duna les di p.e. piano of drum. Si bo tin un hende, cu ta experto y conoci den esaki, nos por involucra nan pa nan bin duna tipo di les asina, na un forma pedagogicamente responsabel, te ora cu nos logra haya docentenan specialisa den cada area di arte y cultura. Nos tin cu promove esaki hopi mas, mescos cu awo a bin e docentenan pa duna les di deporte, nos mester por brinda e oportunidad aki tambe na e personanan interesa, pa duna e materianan expresivo na nos scolnan,” Ras a enfatisa.
RIETVELD ACADEMIE
Finalmente no por descarta e problematica di Rietveld Academie, cu tabata un decision di minister Lampe, mirando cu e fundacion tabata costa hopi placa (4.1 miyon) y e cantidad di studiante, cu ta probecha di e tipo di enseñansa aki tabata 6. Ta lamentabel cu e gobierno anterior, no a percura pa mehora y supervisa e maneho descabeya aki y evita cu Rietveld Academie di Hulanda, kita e credibilidad cu nan a duna na e scol aki. “Con bay bin, como pais nos mester enfoca y impulsa e accionnan cu ta duna arte y cultura su luga den nos sociedad, ya cu sin duda, nan ta un parti esencial den construccion di un pais mas igualitario y prepara nos hendenan pa e desafionan di desaroyo,” Ras a finalisa bisando.