Yuyika Tromp y Sharyen Simon ta e unico dos coredornan cu lo bai participa den e IHRA Sumit Super Series World Finals. Ambos a bira campeon maximo den nan categoria pa loke ta e International Hot Rod Association Summit Super Series pa e aña aki na Aruba.
Durante e bishita na e despacho di Minister Dangui Oduber awe mainta, sigur e Minister por a sera conoci un poco mas di cerca di loke ta e sentimentonan di un jovencita di apenas 12 aña cu lo bai carga un responsabilidad di defende bandera di su pais.
Minister Dangui Oduber a enfatisa cu su tarea ta pa hasi lo maximo pa asisti, te cu unda cu por, pa Ruzischka Tromp y Sharyen Simon por bai un campeonato mundial di e magnitud aki. Minister Dangui Oduber a expresa cu e ta na altura cu ta sesenta coredor di tur parti di Merca, Hawaii y Canada ta bai participa den cada categoria. Y sigur ta duna su apoyo y sosten. Esaki ta un reto hopi grandi pa dos damita Arubiano y nos ta orguyoso di cada un di nan.
Mas a lew Minister Dangui Oduber a enfatisa cu di su banda y hunto cu un team di expertonan, tanto local y di Merca, ta explorando tur posibilidad pa mira kico ta mihor pa e facilidad di drag racing na Palo Marga. “Nos sa cu Palo Marga mester di asisitencia, pero mi plan ta pa hasi di Palo Marga un proyecto completo y unico. E intencion y vision ta pa converti e facilidad aki den algo mucho mas miho y grandi pa tur tipo di motorsport, un motorsport complex completo. Sigur esaki ta exigi e estudio y planificacionnan necesario” segun Minister Dangui Oduber.
Na final di e encuentro cu Team Sharyen, Minister Dangui Oduber a probecha pa duna Sharyen Simon dos bandera di Aruba. Un lo ta pa e acto official na e pista na Memphis y e otro ta pa Sharyen su team por colga na nan trailer pa e dianan di e caredanan na Memphis. Sharyen Simon a wordo acompaña pa su crew chief y alaves mechanico sr. Ramon Coffy y tambe pa sr. John Kelly cu alavez ta parti di e press team invita pa IHRA.