Noord: Dialuna atardi algo prome cu 3’or, ta sosode un accident semi frontal un poco pariba di e brug di Madushi, dos persona a keda herida den e accidente aki, mesora a pidi pa presencia di polis.
Na yegada nan ta bin topa cu dos persona di edad, cual ambos tabata herida, nan tabata den e auto blanco. E señora kende recientemente a haci un operacion, a haya golpi na su rudia, su casa kende tabata tras di stuur a ricibi algun corta y rasca na su man. E polisnan na e sitio mesora a pidi pa presencia di ambulance.
Na e sitio polisnan a bin compronde cu e auto, un Hyundai Getz preto tabata bayendo direccion pabou y pa un of otro motibo lo a hala bay na su man robes di caminda, net na momento cu e Hyundai blanco tabata biniendo di direccion contrario. E chauffeur di e Hyundai Blanco a trata na evita e accidente pero no a logra y a dal semi frontal contra e Hyundai Getz preto.
Impacto tabata basta fuerte cu e airbag di e auto blanco a sali y a herida e chauffeur di e Hyundai blanco.
Despues cu personal di ambulance a trata e dos personanan na e sitio, nan a transportanan pa hospital.