Diadomingo ultimo 14 october, ASU a celebra su siman di ASU Olimpiada. Esaki a tuma luga na Stadion Guillermo Prospero Trinidad. Tur ekipo di deporte a wordo invita pa cana den e desfile.
Un di e federacionnan presente tabata Aruba Taekwondo Federation, cua tin como miembro Brazil Taekwondo Stichting. Dicho fundacion ta hopi contento cu Rasheed Lowe a wordo scogi pa ASU pa ta parti di e celebracion di e siman di ASU Olimpiada. Rasheed Lowe hunto cu e streya di Bowling srta. Thashaina Seraus a cende e Antorcha Olimpico.
Den un ambiente hopi ameno y cu hopi atleta hoben, a duna apertura di ASU Olimpiada, unda cu Minister Lampe a hiba palabra y a splica e motibo pa cua Enseñansa y Deporte semper a bay hunto. E mandatario a gradeci tur e federacionnan presente, tur e mayornan, coachnan y tur otro persona cu di un of otro manera, ta yuda pa un atleta cumpli cu su deporte. Tambe Minister Lampe a gradeci ASU pa e invitacion y a termina bisando; “Un curpa sano, ta un mente sano.”