ORANJESTAD, Aruba – 14 di October 2018: Diasabra a inicia e campeonato di Lifida 2018-2019 y pa esaki Arubaanse Voetbal Bond (AVB) tabata feliz pa mira un otro campeonato. E campeonato a inicia cu un apertura unda cu tur team a marcha dilanti un publico grandi. Tambe e grupo di baile Popcorn Dancers a deleita e publico presente cu nan estilo di baile.
AVB tabata contento di e inicio di e campeonato di futbol infantil 2018-2019. President di AVB, ing. Richard Dijkhoff tabata contento di mira e acogida cu di esunnan cu ta haci esaki posibel, manera e hungadonan y dirigente, a pesar di e yobida cu tabatin. AVB ta elogia e teamnan cu a presenta pa asina duna inicio na e campeonato aki.
E campeonato aki ta uno historico pa motibo cu pa prome biaha ta introduci un formato nobo. Ta cuminsa aplica e sistema cu pa algun aña ta trahando riba dje y a logra esaki por medio di departamento di competencia. Despues di un trabou intenso cu e clubnan, ta logra cu U5 y U7 no lo bay competi manera ta custumbra.
Ta bay organisa dianan di futbol riba diasabra, caminda cu tur organisacion ta bini hunto y muchanan ta hunga futbol, asina Ing. Dijkhoff a splica. E muchanan lo hunga 4 contra 4 y na final di e mainta lo bay saca un team ganado. Tur siman lo bay tin un team ganado. E manera aki lo stimula e muchanan, specialmente esunnan di 5 te cu 7 aña. E muchanan lo haya e placer di hunga futbol, pasobra na final nan kier hunga futbol. AVB ta brinda e muchanan e oportunidad pa practica futbol y e ta parti di e plan di desaroyo cu lo introduci esaki pronto.