ORANJESTAD – Aruba ta tumando pasonan concreto pa realisa su vision pa bira un ehempel den mundo riba desaroyo sostenibel y economia social. E ultimo aki ta un concepto innovativo den cual negoshinan ta tene cuenta cu e impacto c unan ta haci den nan comunidad, pa haci un ganashi. Pa comunidad di Aruba esaki lo kiermen un inicio di discusionnan constructivo pa incorpora ideanan empresarial, sostenibilidad y beneficio comunitario na Aruba. Tambe Aruba lo por traha conhuntamente cu otro islanan den Caribe, manera Corsou y Boneiro y otro paisnan den Union Europeo conhunto cu Comision Europeo.
IDEA como parti di Departamento di Asuntonan Economico, Comercio y Industria a organisa na final di september un conferencia exitoso den Renaissance Convention Center conhuntamente cu Union Europeo riba Economia Social, “Creando Espacio Social den Haci Negoshi”. E conferencia a wordo habri dor di e anfitrion, Minister Xiomara Ruiz-Maduro di Finanzas, Asuntonan Economico y Cultura cu a menciona pasonan concreto tumando lugar riba desaroyo sostenibel. Durante e conferencia aki, iniciativanan concreto na Aruba cu ta impacta e desaroyo economico, pero tambe desaroyo social a wordo presenta. Entre otro, Goshen Sustainable Development, Trampolin pa Trabao y Cornerstone Economics. For di Boneiro a presenta diferente iniciativanan tumando lugar cu ta stimula colaboracion, impacto social y sostenibilidad financiero. Sr. Edward Erasmus, lector na Universidad di Aruba riba entre otro e tema di Economia Social, a modera e conferencia.
E conferencia aki cu ta forma parti di un serie di 32 evento den e region Europeo riba economia social, a atrae mas cu 100 participante na Aruba, haciendo esaki un di e eventonan mas grandi cu Union Europeo a organisa riba e tema aki.
Despues di e evento exitoso na Aruba, Union Europeo a invita Departamento di Asuntonan Economico pa ta presente na reunionnan riba Economia Social na Bilbao y Bruselas. Na prome luga a comparti resultadonan di e evento exitoso riba economia social cu a tuma lugar na Aruba. Ademas Aruba a asisti na sesionnan pa elabora riba siguiente stapnan di maneho den 2019. Cu un budget mas grandi, Comision Europeo, lo sigui traha hunto cu e 32 regionnan, incluyendo Aruba pa realisa e concepto di economia social y uza e exitonan como un showcase pa otro pais, region y ciudadnan. Asina Aruba ta contribuyendo pa colabora y yuda crea un maneho di economia social riba nivel Europeo cu por yuda tambe teritorionan asocia cu Union Europeo, manera Aruba. Un biaha mas Aruba su nomber ta resonando den seno internacional.