Oranjestad, Aruba: Diabierna y diasabra tabatin e gran celebracion C100, cu ta simbolisa 60 aña di existencia di Cas di Cultura y 40 aña di existencia di Departamento di Cultura y Parlamentario Sue-Ann Ras di fraccion di MEP, tambe tabata presente na ambos evento. Diabierna tabatin un dia completo di congreso, unda cu varios orador a presenta nan experiencia, conocemento, critica, analisis y importancia di e desaroyo di Arte y Cultura na Aruba. Esaki tabata prome biaha cu e dos institutonan aki a uni, pa trece un congreso di nivel hopi halto.
“Loke a resalta durante e congreso, ta e hipocrecia y na mesun momento e ausencia di Arte y Cultura den e curiculo nacional di enseñansa. Mester cuminsa na haci e pregunta: Kico pa bo ta arte? Arte mester haya su lugar, pero mas bien, mester haya comprension di e beneficionan di arte y con e ta relaciona te den profundidad cu cultura,” segun parlamentario Ras. Lamentablemente mester remarca si, cu diabierna durante e congreso, e sala no a conta cu un publico grandi, pero atrobe esey ta un refleho di con nos mes ta wak y duna balor na e topico di arte y cultura.
E presentacion di e docente di CKV, Joan Danies, cu tabata den 2 parti, sigur tabata uno hopi critico, pero na su lugar y bon argumenta. “Joan a sa di trece e berdad di con nos ta anda cu arte y cultura na Aruba. E tantisimo fundacionnan cu mester traha mas uni y stop di bringa otro. Duna contenido, pero tambe sosten financiero na desaroyo di arte y cultura den nos comunidad y nos scolnan, for di chikito te grandi”, Ras a resumi.
E diasabra anochi tabata uno di gala y hopi entrenido musicalmente. E programa tabata uno hopi varia y nos artistanan local a resalta den nan totalidad. E highlight di e anochi tabata e dama Imara Thomas, cu a cautiva tur atencion pa su tremendo dominio di bos y repertorio. Imara Thomas, cantante soprano, a lanta den un famia dota pa musica y su mama Yvonne Thomas, naci na Aruba, semper tabata canta na cas.
“Un palabra di pabien na henter e organisacion di C100, como tambe e team dinamico di Cas di Cultura y Departamento di Cultura p’e tremendo iniciativa y evento aki, cu sigur a surpasa hopi expectativa”, Ras a finalisa bisando.