ORANJESTAD: Automobilistanan ta ta pasa riba L G Smith Boulevard diariamente a tuma nota di e trabouna cu a cuminsa na Harbor Arena. Ta trata aki e preparacion pa e prome ‘Island Takeover Festival’ cu presentacionan di J Balvin, Bad Bunny, Alex Sensation y Jeon dia 2 di November proximo. E ekipo logistico bou guia di Elite Productions & Entertainment a cuminsa na arma e structura cu lo carga e escenario y despues a continua na arma e dak completo di e escenario.
Mirando cu e nivel di produccion ta uno nunca bisto ariba nos isla, e trabounan mester a cuminsa for di awor caba pa asina por keda clan a tempo. E ekipo ta traha cu skema hopi detaya pa asina por produci e espectaculo cu Aruba y nos bishitantenan ta spera ora cu ta trata di nombernan grandi cu lo presenta na Aruba.
E escenario mes lo tin algo cu nunca nos a mira na Aruba cu ta uso di Pixel Mapping y Video Mapping. Pa por cubri e area grandi di ful e escenario pa promer biaha lo ta yegando Aruba dos projector di 30.000 lumen. Esaki ta e potencia cu cada un di e projectornan tin. Pa loke ta e sonido esaki tambe lo wordo re-enforsa di un forma cu e publico lo sinti un sonido hopi mas yen compara cu otro festivalnan. Otro siman e ekipo lo cuminsa cu trabouna di luz, sonido y video.
Pa loke ta e benta di carchi, esaki ta bayendo den bon rumbo y ta conseha tur persona pa cumpra nan carchi mas pronto posibel mirando cu algun di e actividadnan e cupo di hende ta limita.‘Passes’ ta na benta na Citgo Boulevard, Citgo Palm Beach, Citgo Essoville , Superfood y AITO Pop Up Store na Renaissance Marketplace. Por escohe entre Seccion general (AITO General Pass, VIP Standing (AITO VIP Pass) y mesa VIP. Pa tur informacion toante mesa mester jama 569-6446.
Apart di e concierto principal lo tin e ‘Welcome Party’ Diahuebs dia 1 di November na Craft y Gusto Nightclub, sigi pa e concierto mes cu lo ta Diabierna dia 2 di November na Harbor Arena. Diasabra na Renaissance Pool Party y na Surfside Beach lo tin e famoso fiestanan presenta pa EF y Partai cu e genero electronico. Diadomingo tur cos ta termina cu e closing party na Surfside Beach cu musica varia for di 1 or di merdia.
Aruba Island Takeover (AITO) ta presenta pa Aruba Tourism Authority (ATA), Aruba Trading Company, SETAR N.V., Elite Empire Entertainment, EF, Aruba Marriot Resort, Top Drive, Hilton Aruba Caribbean, Hyatt Regency Aruba Resort, Fun Miles, Renaissance Aruba Resort y Super Car Rental. Pa mas informacion, line-up di artista, compra di tickets y mas bishita www.islandtakeover.com of www.facebook.com/islandtakeover.