Oranjestad – Durante e ultimo lunanan, varios reunion interno a wordo teni y tambe proyeccionnan y plannan pa 2019 a wordo discuti entre socionan di turismo, cu Hunta di Supervision di A.T.A. y dentro di e ekipo di A.T.A. mes.
Despues di a considera aspectonan riba nivel di maneho di turismo nacional, despues di a revisa entre otro recomendacionnan di AHATA, y despues di a conduci analisisnan respectivo y consulta cu e ekipo interno durante un proceso extenso, A.T.A. ta continua cu e proceso di aprobacion formal presentando y entregando na Minister di Turismo Danguillaume Oduber e presupuesto y plannan pa 2019, esaki dia 10 di october 2018 ultimo. Conforme ley, A.TA. tin cu entrega su presupuesto y plannan no mas tarda cu 1er di september na Hunta di Supervision.
Minister di Turismo a expresa su gratitud pa entrega di e rapport, unda el a comparti entre otro cu pa loke ta e cantidad di placa cu e turista lo laga atras pa 2019 esaki ta proyecta un crecemento di entre 3% pa 4 % cual sigur ta un noticia positivo mirando cu e maneho di su ministerio ta dirigi riba atrae e bishitante cu por laga mas atras den nos economia y cu esaki ta cumpli cu e vision di su ministerio.
Ronella Tjin Asjoe-Croes CEO di Aruba Tourism Authority a conclui: “Nos ta satisfecho cu pa di 8 aña consecutivo a entrega e presupuesto conforme loke ley ta prescribi pa A.T.A. E proceso pa entrega e presupuesto ta tuma lunas di preparacion pa asina evalua y determina kico ta e miho strategia pa e aña cu ta sigui –esaki mas cu claro ta cuadra den e malchi mas amplio di e plan strategico pa Aruba su turismo. En general por bisa cu aña pasa y e aña aki tawata añanan bon pa loke ta trata entrada por medio di turismo. Aunke e demanda pa Aruba ta sigui ta fuerte, unda ta anticipa un comienso fuerte pa otro aña, aña 2019 no ta bay ta un aña facil manera e añanan anterior, pero e plan presenta lo mester permiti pa confronta competencia mas fuerte den area di Caribe unda cu varios destinacion lo ta bek riba pia cu producto renoba y na prijs hopi rebaha, despues cu a wordo azota pa horcan den 2017.”
Proyeccionnan 2019
Pa loke ta e 4 indicadornan principal nacional; pa 2019 a inclui como proyeccion un crecemento di 2.8% den ‘stay-over arrivals’ (turistanan di estadia) y un cremento di entre 3% y 4% den Tourism Receipts. Pa cu resultado di RevPar, esaki ta proyecta pa consolida – igual pa cu turismo crucero pa cu cantidad di bishitantenan crucero. Pues pa e ultimo dos indicador lo mantene locual lo registra como resultado na 2018.
Averahe di Crecemento Anual 2011-2017
Desde di introduccion di A.T.A. Sui Generis na 2011, metanan a base di e 4 indicadornan principal a ser cumpli. Por nota e averahe di crecemento anual pa cada un di e indicadornan pa cu e periodo di 2011 pa 2017: Stay-Over Arrivals: +4%, Tourism Receipts: +4%, RevPar: +6%, Cruise Arrivals: +5%.
Proyeccionnan 2018 ‘Con lo cera aña?’
E demanda halto for di Merca pero tambe e retonan for di Venezuela ta percura cu 2018 ta proyecta cu ‘stay-over arrivals’ lo cera aña cu un bahada di 1% -incluyendo Venezuela. Sinembargo tur continente ta proyecta di cera cu un crecemento, ora exclui Venezuela. Pa cu Tourism Receipts esaki ta proyecta pa crece cu 4%, pa 2018. Conforme proyeccion di AHATA lo cera 2018 cu un crecemento den RevPar cu 13%.
Turismo crucero ta proyecta cu lo sigui crece durante 2018 pero cu lo consolida fin di aña. Dos indicadornan clave di ‘calidad’ di turismo esta Tourism Receipts y RevPar, lo sera 2018 riba metanan stipula pa e aña aki.
Presupuesto 2019
Conforme presupuesto presenta pa 2019, 80% di A.T.A. su entrada operacional (revenues) lo ser uza pa mercadeo internacional y parti di esaki pa mehoracion di nos producto turistico.
Ronella Tjin Asjoe-Croes ta gradici y felicita e ekipo completo di A.T.A. cu a traha duro pa asina percura un biaha mas pa Aruba Tourism Authority por entrega un documento completo y bon balansa.
Presente pa esaki tawata: Minister di Turismo Danguillaume Oduber, Consehero General di Minister di Turismo Gerald Tsu, Consehero di Turismo di Minister di Turismo Marlee Lacle, miembro di Hunta di Supervision di A.T.A. Cisco Quant, Consehero di Minister di Turismo pa cu e fondo di ‘TPF’ Sharlise Romano, como tambe CEO di A.T.A. Ronella Tjin Asjoe-Croes, CMO Sanju Luidens-Daryanani, CFO Maas van Drie y Dyane Vis-Escalona, Business Manager di A.T.A.