Parlamentario Endy Croes ta hopi preocupa e manera cu AVP mediante Benny Sevinger y Mike Eman tabata corumpi nos sistema cometiendo fraudenan grandi cu patrimonio di pueblo esta cu terenonan di e pais aki. Awe Croes lo trece un otro prueba dilanti. Nos ta cerca di un aña cu gobierno a sinta pero cada dia ta keda encontra cadavernan den lachi cu ta muestra di e corupcion sin fin cu Mike Eman y Benny Sevinger tabata practica cu patrimonio di pueblo. E modus operandi ta conoci y awor ta na Ministerio Publico pa haci nan trabao cu e toolsnan cu nan tin pa trece e pruebanan dilanti y deal cu e hendenan cu a horta e pais aki.
Tereno pa traha condominio
Mescos e otro terenonan awe lo presenta uno bao di nomber di Damira Real Estate. Damira Real Estate ta di casa di Gaby Werleman y Gaby ta intimo amigo di Henny Eman (antes riba lista di AVP) y tambe gran amigo y consehero di Mike Eman. Damira Real Estate & Construction N.V. a pidi un tereno comercial como optie pa traha Condominio na Eagle Beach. Manera custumber mesora Minister Benny Sevinger a firma akkoord pa amigonan di cas di Mike Eman haya dicho optie y mester paga un suma di Afl. 5847 florin. Te hasta tin un ministeriele beschikking na DIP conoci bao DIP # 1758-A riba esaki. Ta solamente menciona esaki pa Mike Eman no laba man manera semper y bisa cu e no sa di nada.
Fechoria cu tereno di pueblo
Dia 1 di november 2016 Land Aruba ta prepara un erfpachtovereenkomst cu Damira Real Estate cual ta wordo firma 24 di november 2016 unda Land Aruba (Benny y Mike) ta duna 3 pida tereno di grandura di 8850 M2 pa un proyecto pa Condominiumgebouw annex Boutique training facility Cafe y cu ta calcula na Afl. 22.2 MIYON florin. Manera cu esaki a caba di wordo traspasa pa Damira Real Estate cual Real Estate ta di casa di Gaby Werleman amigo intimo di Mike Eman y Henny Eman, Damira Real Estate ta manda un carta data 29 di november 2016 pa Benny Sevinger haciendo uso di artikel # 22 di e contract di Land Aruba pidiendo Benny su permiso pa Damira Real Estate bende su sharesnan cu Donaco Group V.B.A. Pues ni 5 dia despues y aki claramente ta muestra cu Damira Real Estate tabata tin un cumprador ta para ta warda y tabata abusa di su contacto interno di amistad cu Mike y Henny Eman pa asina cristalisa nan fechorianan. Mesun dia Benny ta aproba esaki y dia 30 di november 2016, un (1) dia despues e carta a sali cu aprobacion di Benny cu Damira Real Estate por dal bay bende Shares y pues e tereno di pueblo di 8850 M2 como optie lo bay cu e shares pa algun amigo di AVP bira miyonario. Asina e benta di tereno tabata bay.
Ladronicia di tereno na 3.5 miyon dollar
Dia 9 di december 2016 DIP ta manda un carta pa Damira Real Estate NV splicando nan cu di acuerdo cu nan peticion di 29 di november 2016 pa traspaso di Shares minister a bay di acuerdo 1 dia despues, esta 30 di november 2016. Mas tristo di tur e caso aki ta cu e akte di notaris pa cu e benta di Shares a tuma lugar 30 di november 2016, pues mesun dia cu Minister a firma y bay di acuerdo. Ta con Damira Real Estate por a ricibi un carta dia 9 di december 2016 cu Minister a bay di acuerdo siendo 9 dia promer unda ya el a bende e sharesnan caba y esaki a pasa 30 di november 2016 na Notaris? OM, boso ta cumi? Boso ta cu pueblo? Pueblo, e Sharesnan aki cu e tereno di 8850 M2 di Pueblo a wordo bendi pa un suma di $3.5550.000 esta 3.5 MIYON US DOLLAR y na Hulandes 3.5 MILJOEN US Dollar. Adhunto e prueba di esaki esta e sharesholder resolution. Pues asina e fiesta di corupcion tabata tuma lugar durante gobierno di AVP. Mike Eman y Benny Sevinger por bin dilanti y desmenti cu nan no sa? Mi ta reta boso tur dos. Actonan di sinberguensa asina mester yega su fin y esnan culpabel mester paga pa nan actonan fraudulento. Na Brazil, Corsou, Peru, Ministerio Publico tin politiconan cu a comete fraude tras di trali. Nos ta spera aceleracion den investigacionnan pasobra esnan cu a faya mester haya, Parlamentario Croes ta termina bisando.