ORANJESTAD, Aruba – 12 oktober 2018: Nos ta den e temporada di aña unda awa ta yobe mas den region di caribe y esaki ta trece cu ne tambe cu e cantidad di sanguranan ta bira mas. Mas hopi e cantidad di sangura, mas grandi e risico pa malesanan transmiti pa sangura manera Zika, Dengue, Chikungunya y Keintura Geel.
Na Aruba nos no tin e malesa di Keintura Geel, pero si nos tin e sangura cu por transmiti esaki cu ta e sangura Aedes Aegypti. Door di introduccion di e regulacion nobo pa turista procedente di paisnan cu tin keintura Geel na maart 2018 ta purba di mantene Aruba liber di Keintura Geel mas largo posibel. Como cu e regulacion aki ta solamente pa turista y no pa residente di Aruba, no por descarta e posibilidad cu e malesa por keda introduci na Aruba pa un residente.
Departamento di Salud Publico ta recomenda tur residente cu ta bay di biahe pa tuma e vacuna contra keintura geel pero como cu actualmente esaki no ta disponibel ta conseha tur residente pa proteha nan mes contra picadura di sangura door di uza repelente contra sangura regularmente y bisti paña manga largo y carson largo y si despues di regresa na Aruba ta presenta sintoma di keintura, acudi cerca nan dokter di cas mas pronto posibel.
Pa mas informacion por tuma contacto cu Seccion di Malesanan Contagioso na 522-4200
