Home Lifestyle Trahando hunto riba mas conscientisacion pa bisa NO na droga, tabaco, violencia...

Trahando hunto riba mas conscientisacion pa bisa NO na droga, tabaco, violencia y alcohol F.A.D.A ta celebra Siman di Cinta Cora

 

 

ORANJESTAD, Aruba – 11 di October 2018: E aña aki Fundacion Anti Droga Aruba (F.A.D.A) ta celebra un otro Siman di Cinta Cora, den e siman di 22 pa 31 di October. Pa hopi aña caba F.A.D.A ta forma parti di “Ribbon Week International”, un campaña di prevencion y conscientisacion riba alcohol, tabaco, droga y violencia. Ta tene e campaña aki tur aña den luna di October y e aña aki e lema ta di “Life is your journey, Travel drug free”.

 

E Siman di Cinta Cora a cuminsa na e ciudad Calexico, Mexico, ora cu na aña 1985 a secuestra, tortura y asesina funcionario di DEA, Enrique “Kiki” Camarena. Despues cu a haya e curpa di Enrique Camarena y su piloto, investigacion a revela cu a tortura e agente extensivamente prome cu a mat’e. Habitantenan di  Calexico, ciudad natal di Camarena, a cuminsa bisti cinta cora na su honor.

 

Asina aki e cinta cora a bira un simbolo di prevencion y cu e meta di educacion na reduci e demanda di droganan ilegal. Bistiendo cinta cora ta mustra e desaprobacion contra uzo di droga. E cinta aki no ta solamente un homenahe na Enrique Camarena, pero na tur ser femenino y masculino cu a haci e sacrificio maximo den e sosten di guera contra narcotrafico.

 

F.A.D.A ta recorda tur hende riba e importancia di e campaña aki. Durante e siman di bisti na locura tin un schedule y ta cuminsa dia 22 di October. E prome dia ta invita tur hende pa bisti un paña of un articulo cora y bisa no na droga. Dia 23 di October ta “Sox it na droga”, unda por bisti meanan colorido of no usual.

 

Dia 24 di October ta dia di “Sigui bo soño”, kiermen bisti na un super hero, profesion di bo gusto of pidjama. E siman di bisti na locura ta sigui dia 25 di october y esaki ta “Hat day” unda bo por bisti un pechi of sombre. Dia 26 di October ta “Travel drug free day” y e dia aki ta crea algo creativo cu mensahe di lema.

 

Saca potret di bo Siman di bisti na locura di e campaña di “Life is your journey, Travel drug free” y comparti esaki ariba Facebook di FADA Aruba y haya chens pa gana. E Siman di Cinta Cora ta trece miyones hende hunto pa conscientisa riba e peliger di alcohol, tabaco y droganan. Tambe ta curasha riba e prevencion, intervencion na tempo y tratamento. F.A.D.A ta invita comunidad di Aruba pa celebra e Siman di Cinta Cora, pero tambe pa participa den e siman di bisti na locura.