Riba diadomingo 30 di september 2018 Aruba Reef Care Foundation a organisa su proyecto di beach clean up pa di 24 aña.
E aña aki Rotary Club of Aruba un bes mas a forma parti di esaki hunto cu su partner clubs, Rotaract Club of Aruba y Interact Club of Aruba di Schakel College y boluntarionan cu semper ta sostene e club y proyectonan pa nos comunidad. E famia Rotariano a scohe pa hasi “Bachelor’s Beach” limpi. A yena un truck di 3 yarda cu saconan di sushi yena cu plastic y otro material sushi cu a wordo recogi riba e beach.
Alaves Rotaract Club of Aruba a uni cu Rotaract Club di Maneiro Venezuela pa asina trese concientisacion pa e dia internacional di limpiesa di costanan rond mundo usando e nomber “World Beach Day” asina aki Rotaract ta uni su mes na e causa pa proteha nos beach y reef nan y tambe concientisa e pueblo di Aruba tocante e consequencianan di sushedad riba beach y den lama.
Rotaract Club of Aruba tin nos medio ambiente na pecho y ta usa mas tanto posibel productonan ‘environmentally friendly’ cu ta biodegradable, compost of recycled pa asina yuda cu e reto aki den nos medio ambiente y tambe pa asina ta responsabel pa cu nos medio ambiente.
Rotary Club of Aruba kier a gradici tur e miembronan di Rotary Club of Aruba, Rotaract Club of Aruba y Interact Club of Aruba y tur boluntarionan cu a bin yuda cu e beach clean up. Un danki na Bon Bini Cargo cu a pone un trucks disponibel pa e diadomingo aki.
E famia di Rotary Club of Aruba kier a duna un danki specialmente na Aruba Reef Care Foundation cu ta organisa proyectonan valioso pa asina cuida nos beachnan.