Oranjestad – Den cuadro di e maneho di Minister di Cultura pa gradici como tambe sigui motiva y stimula esnan cu ta aporta na promove, sostene y engrandece nos cultura arubano, diahuebs durante un actividad ameno Gobierno di Aruba pa medio di Minister Ruiz-Maduro tabata tin e honor y placer pa duna un homenahe special na Sra. Tecla Delfina Kelly-Hernandez, pa su añanan dedica na cultura di nos país Aruba.
Despues di yegada di invitadonan, e anochi a wordo habri pa e maestro di ceremonia Sr. Ruben “Scorpio” Garcia kende a sa dirigi e bunita anochi aki na forma inico y agradabel manera Tecla merece. Un bunita video a wordo prepara special pa e anochi aki caminda a duna en corto un refleho di kende ta Sra. Tecla Delfina Kelly-Hernandez.
Minister di Cultura Sra. Xiomara Ruiz-Maduro a hiba palabra caminda el’a trece dilanti cu e tambe ta bini di Playa Pabao cual ta hacie sinti hopi mas orguyoso di por duna Tecla e bunita reconocimiento aki, mas aun cu trata aki di nos hende muhernan cu ta destaca den comunidad. Tecla su trajectoria di dedicacion boluntario cu a surpasa mei siglo. Hopi kisas lo a conoce na timon di actividadnan carnavalesco so pero poco kisas sa cu desde un edad hopi hoben ya Tecla tabata dedica na actividadnan di grupo y organizacionan manera grupo di mucha muhernan den formacion, grupo di comedia, duna huiswerkbegeleiding na muchanan di bario, forma parti di organizacion di canto, contribucion na busca candidatanan pa Miss Aruba y por ultimo a dedica añanan na nos carnaval tanto local como internacionalmente.
Tur esaki y hopi mas a contribui cu Tecla ta ser considera un lider pa loke ta trata nos cultura y su contribucion sigur ta di balor grandi den desaroyo cultural di nos pais. Pa es motibo aki, cu presencia di familiar- y amistadnan cerca di Sra. Tecla, e titular di cultura a brinda un homenahe na Sra. Tecla Kelly-Hernandez como un lider den comunidad cu a contribui grandemente na nos cultura. E mandatario a expresa cu e conocimiento y experencia amplio di Tecla sigur ta un aporte grandi pa sigui desaroya y engrandece nos cultura. Durante e evento special aki tabata tin presentacion di Steel Edition di Sr. Benito Gomez cual a trece un ambiente ameno dilanti. Un gradicimiento na un y tur, na famia y amistadnan, como tambe na staf y personal Old Man The Sea cu a haci e anochi aki uno unico y inolvidabel pa Sra. Tecla Kelly.