Home Politics Mike Eman lider di AVP: Ora yega porta di Bestuurskantoor ta Aruba...

Mike Eman lider di AVP: Ora yega porta di Bestuurskantoor ta Aruba completo mester ta representa eynan Pa bisa cu asina no por trata un pueblo

KICO A PASA?: Esaki ta e pregunta cu Mike Eman, lider di AVP ta haci, despues di a mira e relato di pronostico di Banco Central di Aruba ora mira e caida den economia di Aruba y e cifranan cu ta mustra e caida aki di 1.2% na 0.3%, na rand di recesion.

E Business Survey di BCA ta bisa cu den e ultimo kwartaal di 2017 tabatin optimismo. A constata cu benta tabata halto, e hendenan tabata inverti, tabatin confiansa den futuro di e pais. Den di dos kwartaal di 2018, confiansa a cay, inversion a cay y henter comercio ta sinti un caida den economia di pais Aruba.

“Kico a sosode. Esaki ta awe e motibo cu henter nos comunidad tin cu cuminsa prepara nan mes y uni, si no kier mas desempleo y aumento di costo di bida.

Si tende cu den presupuesto 2019 mester sera un buraco di 100 miyon florin di gasto cu nan a subi den 2018, nos ta teme cu ora cu bay ranca e 100 miyon florin for di economia, mas sufrimento ta bay tin serca nos pueblo, mas caida ta bay tin den comercio y empleo.”

Loke cu a pasa tambe ta cu na inicio di 2018 dado momento e mercado a perde su confiansa den e direccion di pais Aruba.

E prome señalnan tabata visto for di dia 22 di september caba ora cu a mira cu lo bin un Gobierno cu un asignatura cu nunca no a Goberna di otro forma si no ta cu medida riba pueblo, maneho di faborece “friends & family” y persecucion politico.  AVP for di e momento ey tabata teme kico ta spera nos pueblo.

Na april, 2018 Fitch a bin Aruba y a papia cu e Gobernantenan. Despues di a analysa tur cos nan a cambia nan “outlook” pa economia di Aruba di “stable” pa “negative”.

Esaki despues di a haya un pais cu un crecemento di 1.2%, stabiel, y Fitch a topa cu un Gobierno cu no tin un plan y no tin vision, solamente tabata papia di e Gobierno anterior.

“Nan a mira cu no tin hende cu capacidad y vision pa dirigi e pais aki.”

Dos luna despues a bin Standard & Poor’s cu a papia cu tur instancia y Gobernantenan y tambe a revisa e outlook pa negativo. Dos rating agency international, a midi e Gobierno su plan y vision y nan conlusion tabata cu no tin nada cu ta duna nan confiansa den futuro economia di Aruba, treciendo stabilidad y progreso economico. Te cu e momento ey ambos agencia tabatin pa Aruba un “outlook” stabiel y despues a cambia esaki pa “negative outlook”.

Eseynan tabata suficiente indicacion cu e Gobierno ta hibando Aruba den direccion robes. Y tur cifranan di agencianan international y institucionnan local ta bsando e mesun cos: no tin un rumbo fiho cu ta duna confiansa. Ni e consumidor ni comercio tin confianza mientras e gobierno ta hibando Aruba riba rumbo di recesion.

Tur esaki, Mike Eman ta bisa, ta bin ora cu tin un Gobierno sin plan ni vision, pero solamente un pakete di medida y drumi lanta ta papia di gobernacion anterior.

E comunidad no ta sinti e confiansa, peor ora cu nan cartera ta wordo afecta y e perdida di confiansa ta bini. “Bo mester tin un plan, un vision, un proposito pa sirbi e pais y hiba e pais dilanti. Ora cu mi a drenta Gobernacion mi no a papia di loke Nel Oduber a laga pami, un pais den bancarota. Pero mi Gobierno no a pasa un minuut ta papia di e cosnan ey. Nos a busca KLM y Carnival Cruises bek. Nos a cuminsa pusha turismo pa e crece, a sinta cu Valero na mesa, a cuminsa cu renobacion di bario, di centronan di ciudad, infrastructura y scolnan.

Tur caminda a cana pa duna empuhe na economia di Aruba. A busca solucion sin mira atras, sin kita hende di trabou, pero traha pa e pueblo.

P’esey e Gobierno aki a haya un pais cu crecemento economico, cu confiansa, cu poder di compra recupera, pero tur esaki e Gobierno di MEP conoci pa medida, persecucion politico y faborecemento di amigo y famia.” A kibra den menos di 1 anja.

El a finalisa bisando cu e direccion aki ta algo cu AVP no por acepta pa Aruba, pero e responsabilidad ta di tur hende. Ora cu yega na porta di Bestuurskantoor ta Aruba completo mester ta representa eynan, pa bisa cu asina no por trata un pueblo.

“Nan no tin credibilidad pa Goberna e pais aki, despues di a priminti tanto cos y haci lo contrario”