Mientras e siman aki pueblo di Aruba a conoce dos anuncio cu segun gobierno lo ta hopi importante pa pueblo, mester remarca cu keto bay gobernacion basa riba nepotismo, previlegio y populismo ta sigui.
Di un banda nos ta tende yen di fanfaria for di Prome Minister cu lo bay introduci e Oficina di Integridad y tambe e Camber di Integridad, y cu Minister di Husticia ta anuncia un maneho nobo pa loke ta trata admision di stranheronan, di otro banda nos por constanta cu sin un base di integridad y sin respet pa nos reglanan ministernan ta tuma ley den nan man y ta obliga ambtenaar pa actua incorectamente contra e esencia di integridad.
Mientras cu tur dia nos por tende parlamentario- y gobernantenan ta propaganda cu desde aña pasa pueblo por sinti e cambio, parce tog cu nada no a cambia. Sigur no pa loke ta trata “asunto di stranheria”. E mesun situacion di tempo di Benny y Dowers (AVPOR), na unda e portanan di Aruba tabata hancho habri, ta sigui keto bay aki na Aruba. Peor ainda esaki lo bay ta, cu e maneho nobo anuncio dor di minister di Husticia.
UPP ta referi aki na e custumber di haci un show y gaña detene hende pa despues un minister yama pa laga e hendenan sali bek, keto bay ta sosodiendo den e gobierno aki di POREDmep!!
Esaki a pasa e ultimo dos simannan atrobe na dos ocacion, na momento cu Guarda nos Costa ta gara trahadornan sin documento apropia y pa despues, a base di un instruccion di Minister, ta laga e personanan aki bay den libertad, pasobra ta trata aki sea famia, amigo/famia of sponsor di partido.
Raro ta cu den ambos caso, e dia despues di e sucedido, ta drenta hasta un conseho positivo di DPL, SIN cu tin un “eerste aanvraag” entrega mes na Dimas pa nuin di e dos personanan aki haya permiso. Segun informacion ambos persona tabata traha den e periodo cu nan tabata aki como TURISTA, pues cu “toeristisch verblijfsvergunning” di 180 dia. Ambos persona ta aki ainda. Esaki ta imposibel y contra ley.
Segun informacion ta varios minister ta implica den esaki, mirando nan lasonan familiar di un banda y tambe e lasonan di patrocinador di campaña. Ta wordo papia aki di un “tag-team” di minister di Labor, esun di Hustica y esun di Medio Ambiente!
Segun informacion, parce cu e asunto aki tin varios trahadornan di Guarda nos Costa rabia, disgusta y fada. Esaki mirando e esfuerzo cu nan a bin ta haciendo pa cumpli cu nan deber y leynan di Aruba, anto instruccion ta bini di ariba pa laga e personanan aki bay, pasobra meneernan comerciante no ta nada contento cu esaki. Conociendo e hefe di GNC, nos no por imagina nos mes cu e por ta contento cu loke ta pasando, ya cu e actonan aki no ta nada integro.
Pa colmo minister Bikker den un intervista na un radioemisora diahuebs atardi, a admiti e sucedido, y a bin cu e “smoesje” cu e lo no por haci nada, pasobra cu en berdad tin consehonan positivo. Ta inexplicabel con un minister di Husticia por bisa semehante barbaridad asina. Minister Bikker ta esun cu ta duna permiso, y pues nos por bay sconde tras di conseho di DPL, cu por cierto ta perde tur balor ora cu persona ta burla di nos leynan. Pero minister tambe ta burlando di nos leynan, ya cu ta trata di un “positief advies” despues cu e personanan aki a wordo encontra ta trahando SIN PERMISO, sin tin ni un peticion entrega pa nan prome permiso pa traha na Aruba. E personanan aki a burla di nos leynan, pero pasobra den e prome caso tin lazonan familiar hopi cerca y den e otro caso ta pasobra ta un sponsor grandi di partido, ambos persona NO a wordo deporta conforme nos ley di LTU. Ta un super “cheap shot” di minister Bikker, burlando asina tambe di nos leynan. E mester simplemente laga “verwijder” e dos personanan aki. PERIOD.
Hopi tabata e critica (cu razon) tempo cu Benny Sevinger a amplia e estadia special di turista di 90 dia pa 180 dia pa turistanan. Nos por corda cuanto problema esaki a trece cune ya cu hendenan ta bin cu un par di 100 dollar y djey nan ta disparse y nan ta bira “turista trahador”. Partidonan di oposicion e tempo ey a critica esaki, pero kico a pasa despues di 17 di november 2017 ora gobierno nobo di POREDmep a sinta? A cambia e maneho di Benny aki? Absolutamente cu no, mirando cu si siman pasa a gara esun cu su 180 dia a pasa (anto trahando), esey ta ensera cu 6 luna pasa a firma pa e “turista” aki keda Aruba. Motibo suficiente pa sake for di Aruba.
Mientras cu razon ta ser bisa cu AVP no tin e autoridad moral pa papia riba hopi asunto, manera di integridad, finanzas publico, permisiologia, maneho di tereno, etc., nos ta riparando cu e ministernan di e gobierno di POREDmep tambe ta haci nan mes culpabel na actonan contra ley y contra interes general. Y esaki ta pone nos haci e pregunta ta ki autoridad moral e gobierno aki tin pa bin cu henter un maneho di integridad y cu ta cuminsa pa impone riba e ambtenaarnan. Esaki mientras cu propio ministernan mes no ta duna muestra di ta integro. Kizas Minister President mester cuminza eynan prome, esta rond dje, prome cu bay wak un tiki mas leu.
E actonan contra ley aki cu minister Bikker a admiti cu a pasa, ta integro? Obviamento cu no. Aki atrobe si bo ta famia of bo ta un sponsor bo ta ser trata cu handschoen di felpa y tur cos ta posibel sino bo por bai piki!!! Asina tabata pasa den e gobierno di AVPOR toch? Y awor kier bin cu un Integriteitskamer. Un ley di integraidad no ta haci bo integro. Actua integro mester ta un “WAY OF LIFE” y cu bo mester a aplica desde prome dia den gobierno.
Nos ta spera tambe cu via e app di Isla Online, gobierno duna e claridad y e berdad riba esaki na pueblo di Aruba.
E maneho anti-Arubiano aki, igual cu a ser hiba pa e gobierno AVPOR, ta conduciendo cu Aruba no ta DI Arubiano mas ni tampoco Aruba ta PA Arubiano mas.
#dunanosarubaback
Booshi Wever
Lider UPP
Brazil 163
Aruba, 12 oktober 2018
