Home » Fundacion Respaldo cu exposicion den Biblioteca Nacional A inaugura exposicion “No tene miedo di Bo storia, e lo inspira un otro”

Fundacion Respaldo cu exposicion den Biblioteca Nacional A inaugura exposicion “No tene miedo di Bo storia, e lo inspira un otro”

by Admin
0 comment 62 views

 

En conexion cu Dia Mundial di Salud Mental

 

Diaranson, 10 di October, tabata dia mundial di salud mental y Fundacion Respaldo a celebra apertura di un exposicion den Biblioteca Nacional na Oranjestad. Segun Director Medico di Fundacion Respaldo, Psikiatra dr. Hendrikus van Gaalen, no ta por nada cu e ta na e luga aki. Den e proximo simannan lo tin hopi mucha ta circula na Biblioteca y di e manera aki Respaldo ta purba pa den un fase mas tempran, no stigmatisa muchanan sino educa nan kico ta psikiatria y trastorno. Henter e anochi a presenta varios video y entrevista, un comienso pa destigmatisa trastornonan mental.

 

“Nos tur por haya un trastorno mental. Mita di nos comunidad por haya un of otro enfermedad mental den nan bida y ta momento pa hunto nos tene cuenta riba e no discriminacion di pashentnan cu trastorno mental”, asina Dr. Hendrikus van Gaalen a enfatisa. E exposicion lo ta habri pa publico te cu otro siman.

 

Exposicion

Stigmatisacion ta hopi molestioso. A haya permiso di e pashentnan bibando den Clinica Respaldo, pa saca nan potret pa uza den e exposicion aki. Un artista a uza potretnan profesional saca dor di e fotografo internacional Annaleen Louwes y nos fotografo local Anuar Habibe. A haci e mesun exposicion aki den otro paisnan na mundo tambe, como un forma pa kibra cu e taboo. Mester pensa riba e impresion di e potretnan riba esunnan cu ta mira nan. E por causa mas stigma of menos stigma door di esaki. Tin hende tabata considera pashentnan di e clinica como loco, pero durante di e exposicion por a tende cu e potretnan tabata hopi bunita y cu ta trata di hendenan manera ami of abo.

 

Respaldo ta gradici

Dr. Hendrikus van Gaalen a gradici e clientenan cu a participa door di a laga saca nan potret. Tambe ta gradici e clientenan cu a papia riba e videonan, manera Ashley y e otronan cu a mustra bon cla, cu ta trata di hendenan manera abo y ami, simplemente cu un tipo di trastorno. Y tur esnan cu a traha tras di cortina pa yuda haci e exposicion aki posibel. Un gradicimento na Biblioteca cu a saca un man pa por acomoda e exposicion aki den forma gratis. Por ultimo dr. van Gaalen a gradici tur esunnan cu a pasa bishita e exposicion aki caba.

 

Tocante Fundacion Respaldo

Desde aña 2017 e prome trabounan a inicia pa funda Fundacion Salud Mental Aruba, RESPALDO, den cual a uni servicionan y organisacionnan bou e mesun fundacion. For di 55 trahado cu a inicia cune na un principio, ta spera di alcansa 100 trahado na fin di e aña aki of comienso di otro aña. Tin dos policlinica disponibel, un pa adulto cu 40 cama disponibel y un pa mucha y hobennan. Tambe tin un team multi disciplinario ambulatorio di FACT, cu ta bishita adulto/hoben y famia unda cu nan ta biba. Otro aña lo dividi e ekipo den dos, un pabao y otro pariba di brug. Desde 1 di augustus 2017 e fundacion ta conta cu un Raad van Bestuur, cu ta inclui Dr. Hendrikus van Gaalen como Director Medico y Presidente, hunto cu Drs. Lex de Jong como Director di Operacion.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio