E comision tecnico consistiendo di Sra Flora Petronilia, FTA- Sr. Hubert Dirksz, Ministerio di Labor Sr. Leo Yarzagaray, Sr. Tito de Cuba representante di gremio comercial, STA – Sr. Diego de Cuba, ya ta den varios luna di preparacion pa asina e dialogo Tripartidista Social-Laboral por inicia. Cu tripartidista nos kiermen dialogo entre Gobierno, gremio laboral y gremio comercial.
Definicion di tripartidismo ta e dialogo social entre Gobierno, representante di dunador di trabou y organisacion di trahadornan como partnernan igual y independiente tratando na logra solucionnan pa asuntonan di interes comun.
E preparacion pues ta conta cu participacion di tur gremio pa den un consensus nacional logra entre otro siguridad laboral, salud y siguridad na pia di trabou, kico haci cu e fenomeno di uitzendbureau/contratistanan, aumento di salario minimo, miho capacidad di compra y diverso aspecto mas cu lo keda atendi durante e Tripartite Social-Laboral.
E preparacionnan aki ta drentando su fase final pa presenta e conseho definitivo na Minister di Labor. Mientras tanto e comision a defini un Statuto cu lo por sirbi como e guia pa e dialogo.
