Parlamentaria di Fraccion di POR por a tuma nota cu ex minister Benny Sevinger a dedica henter siman pasa riba e tema di cambernan di hotel y muy en particular riba Marisol Lopez-Tromp.
E parlamentaria di POR a bias enfaticamente cu cada persona mester carga su responsabilidad pa su temporada di gobernacion, manera cu e ta haci cu su parti. “Loke mi por a firma mi ta para responsabel pe y ta proyectonan cu a keda realisa, pero pa e ultimo 8 añanan tin un cantidad di 7 mil cambernan extra firma door di Benny Sevinger”.
Dos punto cu Benny Sevinger a presenta den su declaracionnan y cu Marisol Lopez-Tromp ta refuta enfaticamente ta cu supuestamente Lopez-Tromp lo a firma pa duna e hotel e terenonan den e wetlands, cual ta un area protehi pa nos ley di zonificacion cu a bin na vigor desde 2008. “Esaki absolutamente no ta berdad, loke tabatin e tempo ey tabata cu esnan cu ta traha na hotel tabatin mester di area pa parker y debi cu no tabatin, a pidi un lugar temporal, sea den huur of cu nan por uza. E tempo ey berdad gobierno a propone a base di conseho di departamentonan y conseheronan pa laganan por uza temporalmente e area banda di The Mill, pero na ningun momento e area aki a wordo otorga na ningun hotelero”. E uzo di e area aki no a bay door tampoco debi cu e trahadornan no tabata considera e area esun di mas miho door cu nan mester a cana den tur e tereno di tera y piedra eympa yega nan trabou.
Marisol a expresa cu esun cu no ta kere lo por bay check esaki a traves di departamento di Kadaster, inclusive e propio ex minister Benny Sevinger, kende ta parse no a haci su huiswerk y ta keriendo cu e tereno aki a wordo otorga.
E otro punto cu Marisol Lopez-Tromp a aclarea ta e punto di un cantidad di 481 camber cu Lopez-Tromp lo a otorga segun un decreto di 2006. Contrario na e declaracionnan di Sevinger, e cantidad di cambernan aki ya caba tabata un hotel na momento cu Marisol Lopez-Tromp a bira minister. E cambernan aki ta trata di Concorde Hotel cu a habri den añanan 70 y tabata construi caba. Es decir, no ta Lopez-Tromp a bin cu e hotel aki. E hotel akinan for di aña 1975 cu tabata destina pa 481 camber y a bira Concorde, nunca a cambia, semper a keda e 481 camber te cu ultimo.
Bestuurscollege a aproba e cantidad di cambernan pa e hotel aki na 1975 y Concorde Hotel a habri su portanan na december 1977.
Marisol ta indica cu por ta Benny Sevinger ta pensa cu pueblo ta bobo y cu no ta busca pa sa, pero ta trata di algo cu ta existi caba y cu ta data for di añanan 70 ora cu Marisol Lopez-Tromp tabata mucha ainda.
